1 қыркүйек күні Қырғызстанның Ыстық көл облысындағы «Еуразия» пансионатының территориясында III Дүниежүзілік көшпенділер ойыны қарсаңында Қазақстан құрамасы делегациясы кездесу өткізді, деп хабарлайды «ҚазАқпарат» ХАА.Шараға қатысушылар алдағы жарыстың бағдарламасымен танысты. Одан соң ҚР МСМ Дене шынықтыру және спорт істері комитетінің қызметкерлері спортшылармен әңгімелесті. «Көгілдір Ыстық көл» пансионатында Қазақстан құрамасының штабы ашылып, онда көк туымыз ілінді және баннер қойылды. Қазіргі сәтте қазақстандық спортшылар 2 қыркүйекте басталатын III Дүниежүзілік көшпенділер ойыны жарыстарына толық дайын. Айта кетейік, спорттық жарыстар 37 ұлттық спорт түрінен өтетін болады. Оған әлемнің 80 елінен үш мыңға жуық адам қатысады. Қазақстан құрамасы сапында 200-ден астам спортшы бар және олар спорттың 30 түрінен ел намысын қорғайды.
Автор: Серікбол Қошмағанбетов
>>> Біздің Facebook, Instagram парақшаларымыз бен Telegram каналымызға жазылыңыз! <<<
