Аймақтың мәдениет саласындағы жаңалық, Асқар Тоқпанов атындағы Жамбыл облыстық академиялық қазақ драма театры Сыр өңіріне гастрольдік сапармен келді.
Театр ұжымы жергілікті көрерменге өздерінің таңдаулы қойылымдарын ұсынғалы отыр. Өнер сапары екі өңірдің мәдени байланысын нығайтып, театр саласының өркендеуіне серпін беретін маңызды рухани байланыс болмақ.
Әріптестерін қарсы алу сәтінде облыстық театрдың абыз ақсақалы, Қазақстанның еңбек сіңірген қайраткері, Қызылорда облысының құрметті азаматы, ІІ дәрежелі «Барыс» және «Құрмет» ордендерінің иегері Хұсейн Әмір-Темір өнер ұжымына жылы лебізін арнап, шығармашылық сапардың сәтті өтуіне тілектестік білдірді.
Жамбыл театры ұжымын Сыр елі ерекше ықыласпен қарсы алды. Өнер өкілдерінің айтуынша, екі театр арасындағы шығармашылық байланыс нығайып, өзара тәжірибе алмасуға кең жол ашылды.
Айта кетейік, А.Тоқпанов атындағы академиялық қазақ драма театрының өнер сапары аясында 20-21 сәуір күндері Н.Бекежанов атындағы қазақ академиялық музыкалық драма театрында «Жыл патшалығының құпиясы» атты ертегі, «Қош, махаббат» лирикалық драмасы, «Бақытсыз Жамал» трагифарсы, «Қараш-қараш» драмасы қойылады.
Жамбылдық театр ұжымы жоғарыдағы бағдарламаға сай Сыр көрермендеріне серпіліс сыйлайтынына сенімді.
«СБ» ақпарат
