Ұстаз еңбегі бүгінде мемлекет тарапынан үлкен қолдауға ие болып отыр. Әсіресе, қиындығы таудай, бірақ адал еңбекпен елдің ықыласына, шәкірттерінің махаббатына бөленіп, құрметіне жеткізетін ұлы мамандықты таңдаған жастарға деген қолдаудың ауыз толтырып айтар тұсы көп-ақ.Атап айтқанда, 2017-2018 оқу жылында ұстаз мәртебесін көтеру мақсатында жас мұғалімдерді шығармашылық тұрғыда қолдау, ел ісіне араластыру, қоғамда үлкен сенім білдіруді қалыптастыру мақсатында «Жолдау жолымен – білім биігіне» тақырыбында жас мұғалімдерден құрылған Үгіт насихат бригадаларының облыстық сайысы өтті. Аймақтық сайыстан бастау алған қалалық білім бөліміне қарасты көптеген мекемелер өздерінің бақтарын сынады. Онда «Қызылорда қалалық қосымша білім беру оқу-әдістемелік орталығының» ұжымы үздік атанып, облыстық кезеңге жолдама алды. Жеті аудан және Қызылорда қаласы командасы арасындағы сайыста Қармақшы ауданы жеңімпаз атанды.
Жеңімпаздарға және әр командадан үздік өнер көрсеткен қатысушыларға облыстық кәсіподақ ұйымының төрайымы Райкүл Байназарова Астана қаласының 20 жылдық мерейтойына орай тегін жолдама тапсырды. Міне, кеше ғана ел жүрегі Астананың 20 жылдығында әсем қаланы аралап, тамаша көңіл-күйде болдық.
Астананы жай ғана араламай жолнұсқаушы маманның көмегімен ғимараттардың, кешендердің, ескерткіштердің тарихымен таныстық. Қала кешендерінің әрбірі өзінше бір тарих. Астананың әдемілігіне тамсанбайтын жан жоқ шығар. Әрине, Қызылордадан барып тұрып, «Өңірлердің Астанаға тартуы» жобасы аясында облыстың ерекше тартуын тамашаламай қайта алмадық.
Байқоңыр ғарыштық айлағынан ұшырылған ғарыштық зымырандардың ашық аспан астындағы музейі қала тұрғындары үшін тамаша тарту болғаны анық. Өйткені, тамашалаушы жандардың көптігі көңіл марқайтты. Елорда сапары керемет әсер сыйлап, ұстаздар қауымы жақсы көңіл-күймен оралды. Осындай демалыс ұйымдастырған облыстық кәсіподақ төрайымы Райкүл Мансұрқызына барша облыс ұстаздарының атынан ерекше алғыс айтқым келеді. Еңбегіңіз жаңа берсін, әрбір ісіңізге сәттілік тілеймін.
Әйгерім ӨСЕРОВА,
қалалық қосымша білім беру оқу-әдістемелік орталығының педагог-ұйымдастырушысы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
