Жыл тоғысар сәтте өңірдегі дарынды балалар мен жасөспірімдерді облыс әкімі Нұрлыбек Нәлібаев құттықтады. «Білімді ұрпақ, өнерлі өрен – ел келешегі» атты «Балалар жылын» қорытындылау салтанатында балалар үйінің тәрбиеленушілері мен ерекше білім алуды қажет ететін, сондай-ақ халықаралық, республикалық олимпиадалардың, ғылыми жобалардың жүлдегерлері мен спорт пен өнерде үздік атанған жеңімпаздар марапатталды.
Аймақ басшысы оқушыларды келе жатқан Жаңа жылмен құттықтап, зор табыс тіледі, «Балалар жылы» аяқталса да, Сыр елінде ақылды да зерек өрендерді қолдау әрі қарай жалғасатынын жеткізді.
– Өтіп бара жатқан Барыс жылына Мемлекет басшысы ерекше мән беріп, «Балалар жылы» деп жариялағанын білесіздер. Атаулы жылы елімізде, оның ішінде өңірде көптеген іс-шаралар жасалды. Түрлі форматтағы 12 мыңға жуық шараға 200 мыңнан астам бала қамтылды. Өткен аптада ел Президенті атынан балаларға арналған Жаңа жылдық шырша ұйымдастырылып, қала және аудандардан келген 200 баланы құттықтадық. Балаларымызға бағалы сыйлықтар табыстадық. Ата-аналарыңызды тек жақсы істермен қуантыңыздар! Сабақты жақсы оқып, спортпен айналысып, қалаған үйірмеге барып, әр күнді ерекше өткізіңіздер. Қанаттарыңыз талмай, ұстаздарыңыздан саналы тәрбие, сапалы білім алып, бейбіт еліміздің атын әлемге танытыңыздар! Ал біз, ағаларыңыз, сіздерді қолдау үшін аянбаймыз! – деді облыс әкімі.
Салтанатты шарада жыл бойы түрлі ғылыми, шығармашылық байқауда жеңімпаз атанған үздік спортшылар, әншілер мен бишілер, қолөнершілер, «Үздік «Атамекен» балалар ауылының тәрбиеленушісі», «Үздік балалар парламенті» секілді номинация иегерлеріне Алғыс хаттар мен планшеттер табысталды.
Айта кетейік, биылдың өзінде 402 сырбойылық өрен халықаралық, республикалық дәрежедегі ғылыми жобалар мен олимпиадалардың, спорт турнирлерінің және өнер конкурсының жеңімпазы мен лауреаты атанды. Биыл балдырғандарға тарту ретінде демеушілер есебінен Қызылорда қаласы және аудандарда құны 1,6 млрд теңгеге 80 спорт-ойын алаңы салынды. Қызылорда қаласында көпбалалы отбасылар мен ата-ана қамқорлығынсыз қалған және жетім балаларға 50 пәтердің кілті табысталды. Биыл Сыр елінде 19 балабақша, 6 мектеп ел игілігіне табысталды. Бұдан бөлек, Қызылорда қаласы және Қармақшы ауданында дарынды балаларға арналған 150 орындық 2 мектеп-интернаты, Жалағаш ауданында 250 орындық «Оқушылар үйі» және «Өнер мектебі» ашылды. Мемлекет басшысының бастамасымен құны 100 млрд теңгеден асатын 21 мектептің құрылысы жүргізіледі.
Үкімет басшысы Әлихан Смайыловтың Сыр өңіріне арнайы жұмыс сапары барысында дарынды балаларға арналған физика-математика бағытындағы мектеп интернаттың құрылысын бастауға қолдау табылды. Алдағы уақытта Қызылорда қаласының сол жағалауында «Оқушылар сарайы» бой көтермек. Заманауи үлгідегі нысан бизнестің әлеуметтік жауапкершілігі аясында «ҚазМұнайГаз» кәсіпорнының демеушілігімен салынатын болады.
Айсәуле ҚАРАПАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
