Қазалыдағы берекелі бастама

304

0

Биылғы күн қабағы көпшілікті ойландырып тұр. Жайдары жаз мезгілі ортасынан асса да, далалықтан жайқала өскен шүйгін көзге көп шалынбайды. Қардың аз жауып, жер қыртысына тоң түспеуі, Сырдариядағы судың тапшылығы, жауын-шашынның болмауы тіршілігі төрт түлікпен байланысты ауылдағы ағайынға  қатал қыстың қамына ерте кірісу қажеттігін еске салғандай.

Жуырда Қазалы ауданының әкімі Мұхтар Оразбаев мал азығын дайындауға баса мән беріп, шаруашылықтардағы алқап­тардан шөп оруды жұрт­шылық арасында ұйымдастыру туралы бастама көтерген болатын. Мұндай жағ­дайда мал азығы дайындалумен қатар егіс алқаптарына су келетін арық-атыздардың іші тазаланып қалатыны белгілі.

Тиімді бастама аяқсыз қалмады. Ауданда шөп орудан сайыс өтті. Жастарды еңбекке баулу, қуаңшылыққа байланысты тұрмысы төмен отбасыларды шөппен қамтамасыз ету мақса­тында ұйымдастырылған сайыс­қа қала, кент және ауылдық округ­терден 40-тан астам жас қатысты.

Қатысушылар таңертеңнен бастап Қарашеңгел ауылдық округіндегі «Жалаңтөс батыр» ЖШС күріш алқабында бел­гіленген жерден шөп орды. Жастарға аудан әкімі М.Оразбаев арнайы келіп, қысылтаяң уақытта осылайша жұмыла көтерген жүк жеңіл болатынын жеткізді.

Жарыс қорытындысы бо­йынша 93 бау шөп орған Жалаңтөс батыр ауылының тұрғыны Ақтілек Бекболат І орынды жеңіп алды. Екінші, үшінші орындарды түк­ті­баевтық Әли Еркебұлан мен Қазалы қаласының атынан қатысқан Рауан Әленов өзара бөлісті. Ал, Қазыбек Ерсұлтан «Шалымды орақшы», Талант Нұрадин «Епті орақшы», Жеңіс Жолдасбаев «Белсенді орақшы», Талап Мурзалиев «Ұқыпты орақ­шы» номинацияларымен мара­патталды.

Жарыстың жеңімпаздары мен жүлдегерлерін аудан әкімінің орынбасары Күнтілес Назымбеков құттықтап, бағалы сыйлықтармен марапаттады. Номинация ие­герлеріне де бағалы сыйлықтар тапсырылды.

Осылайша  1553 бау пішен орылды. Ол аз қамтамасыз етілген және асырау­шысынан айырылған отбасыларға беріледі.

Айта кетейік, жарысты Қазалы ауданы ішкі саясат бөлімінің тапсырысы бойынша аудандық Жастар ресурстық орталығы мен «Қазалы Жомарт» қоғамдық бірлестігі ұйымдастырды.

Жұмабек Табынбаев,

Қазалы ауданы

Пікірлер жоқ. Бірінші болыңыз!

Пікір жазыңыз