Кеше «Өнер орталығында» «Жаңа халықтық конституцияның нормалары мен құндылықтары: Адами капиталды дамыту – білім беру жүйесінің стратегиялық негізі» атты облыстық педагогикалық тамыз конференциясы өтті.
Жиынға облыс әкімі Мұрат Ергешбаев, ҚР Оқу-ағарту министрлігінің Білім саласында сапаны қамтамасыз ету комитеті төрағасының орынбасары Жәмилә Есанова, ҚР Ғылым және жоғары білім министрінің кеңесшісі Руслан Емелбаев, облыстық мәслихат төрағасы Мұрат Тлеумбетов, құқық қорғау органдарының басшылары, зиялы қауым өкілдері, білім саласының ардагерлері мен ұстаздар қатысты.
Салтанатты жиында облыс әкімі Мұрат Ергешбаев ұстаздар қауымын жаңа оқу жылының басталуымен құттықтады. Сөзінің барысында өткен оқу жылының нәтижесін жоғары бағалай келіп, алда тұрған жаңаша міндеттерге тоқталды.
– Құрметті ұстаздар, бүгінгі конференцияда өткен оқу жылының нәтижелерін саралап, алдағы кезеңнің негізгі басымдықтарын айқындаймыз. Алдағы міндет – қол жеткізген нәтижелерімізді сақтап қоймай, білім сапасын жаңа деңгейге көтеру. Осыған байланысты жаңа оқу жылында бірқатар нақты міндетке ерекше назар аударуды ұсынамын.
Президент ауыл мектептерін дамыту үшін білім сапасы төмен аймақтарға нақты қолдау көрсетудің қажеттігін тапсырды. Қала мен ауыл мектептері арасындағы сапа айырмашылығын одан әрі қысқарту, әрбір баланы тұрғылықты жеріне қарамастан сапалы білім беруге жағдай жасауымыз қажет. Сонымен қатар, халықаралық және республикалық олимпиадаларға, ғылыми жобаларға, зияткерлік жарыстарға қатысатын дарынды оқушыларды анықтау, даярлау және қолдау жүйесін күшейту керек. Біз осы бағытта нақты нәтижеге қол жеткізуіміз қажет.
Мемлекет басшысы өз сөзінде Қызылорда облысының Ұлттық бірыңғай тестілеудің нәтижесі бойынша жоғары көрсеткішке қол жеткізгенін ерекше атап өтті. Облысымыз үшінші жыл қатарынан республикада бірінші орынға шықты. Бұл – ең алдымен ұстаздардың табанды еңбегі мен мемлекет тарапынан берілген қолдаулардың нәтижесі деп білемін. Облыстың 967 түлегі «Алтын белгі», 1124 түлегі «Үздік аттестат» иегері атанды. Білім алушылардың жетістіктерін мониторингтеу нәтижесінде облыс оқушылары 4-сыныптар арасында республика бойынша үшінші, 9-сыныптар арасында екінші орынға ие болды. Бұл – жақсы нәтиже. Бірақ осы жетістіктермен шектелуге болмайды – деді облыс әкімі. Бұдан бөлек, аймақ басшысы педагогтердің біліктілігін арттыруды, жас мұғалімдерді қолдау және тәлімгерлік институтын күшейтуді, балалардың заңды мүдделері мен қауіпсіздігін қамтамасыз етуді, әлеуметтік осал топтағы балаларға қажетті көмек көрсетуді, қосымша білім беру ұйымдарының мүмкіндігін тиімді пайдаланып, балалардың бос уақытын ұтымды ұйымдастыруды, сыбайлас жемқорлық тәуекелдерінің алдын алуды тапсырды. Сондай-ақ бүгінгі уақыт талабына сай білім беру жүйесіне жасанды интеллектті енгізудің маңыздылығын, кәсіптік білім берудегі жаңашыл бастамаларды жүзеге асырудың қажеттілігін атап өтті.
Облыс әкімі марапат иелеріне Сыр халқының атынан құттықтау лебіз білдірді. Бұдан әрі қарай білім беру ісінде еселі еңбек етіп жүрген ұстаздар «Құрмет» орденімен, «Ерен еңбегі үшін», «Шапағат» медалімен, «Қазақстанның Еңбек сіңірген ұстазы» құрметті атағымен, Қызылорда облысының Құрмет грамотасымен, «Қызылорда облысының дамуына қосқан үлесі үшін» медалімен, облыс әкімінің Алғыс хатымен, Оқу-ағарту министрлігінің «Еңбек ардагері», «Ыбырай Алтынсарин» медалімен, «Білім беру саласының үздігі» төсбелгісімен, «Орта білім беру ісiнiң үздiгi» құрмет дипломы, Құрмет грамотасы, министрдің Алғыс хатымен марапатталды.
Жиында облыстық білім басқармасының басшысы Асқарбек Есжанов, ҚР Оқу-ағарту министрлігінің Білім саласында сапаны қамтамасыз ету комитеті төрағасының орынбасары Жәмилә Есанова, ҚР Ғылым және жоғары білім министрінің кеңесшісі Руслан Емелбаев, Қорқыт ата атындағы Қызылорда университетінің басқарма төрағасы – ректоры, облыстық қоғамдық кеңес төрағасы Наурызбай Байқадамов, №10 Білім-инновация лицей-интернатының мұғалімі Нағиша Есбосын, Мемлекеттік қызмет істері агенттігінің Қызылорда облысы бойынша департамент басшысы Ерлеген Мендалиев баяндама жасады.
Облыстық білім басқармасының басшысы Асқарбек Есжанов аймақтың білім беру жүйесі кейінгі жылдары тұрақты даму жолына түскенін атап өтті.
– Аймақта 651 мектепке дейінгі ұйым, 327 мектеп, 28 колледж, 63 қосымша және 23 арнайы білім беру ұйымдары бар. Облыс әкімдігінің қолдауымен бүгінде білім саласында тың бастамалар мен жарқын жобалар жүзеге асырылуда. Нәтижесінде аймақтың білім көрсеткіші үш жыл қатарынан үздік деп танылды. Сондай-ақ бұл – аймақ ұстаздарының шәкірт тәрбиелеудегі шынайы шығармашылық ізденіспен еткен еңбегінің жемісі, – деді ол.
Жуырда Астана қаласында Мемлекет басшысы Қасым-Жомарт Кемелұлының қатысуымен өткен ұстаздардың республикалық тамыз конференциясында Жалағаш ауданы Әл Фараби атындағы №201 мектеп-лицейінің мұғалімі Айгүл Шілдебаева «Қазақстанның еңбек сіңірген ұстазы» құрметті атағымен марапатталды. Сондай-ақ үздік шәкірт тәрбиелеп, Президент қабылдауында болған №9 «Білім-инновация» лицейінің информатика пәнінің мұғалімі Батыр Жарқын «Шапағат» медалін иеленген еді.
«Орта білім беретін үздік ұйым» грантына Жаңақорған ауданындағы білім бөлімінің № 286 мектеп-лицей лайық деп танылды.
Айта кетейік, Мемлекет басшысының, Үкіметтің ерекше қолдауымен 2022 жылдан бері 121 млрд теңгеден астам қаржыға 46 заманауи білім беру нысаны салынды. Аймағымызда көп жылдардан бері өзекті болған үш ауысымды мектептер мәселесі толық шешілді.
Биыл «AI-Kerim» балалар білім беру-сауықтыру орталығы пайдалануға берілді. Орталық жыл сайын 8400 баланы қамтып, робототехника, бағдарламалау, инженерлік жобалау және басқа да заманауи дағдыларды үйретуде. Ботаникалық білім беру орталығы да іске қосылды. Мұнда оқушылар биология, экология және ботаника бағыттарын тәжірибе жүзінде меңгеруде. Сондай-ақ Сыр түлектеріне «Сыр жұлдыздары» шығармашылық-инновациялық академиясы, Оқушылар үйі қызмет көрсетеді.
Ғазиза ӘБІЛДА,
«Сыр бойы»
