Өңір жастарынан құралған «Жасыл ел» еңбек жасақтарының маусымдық жұмысының қорытынды іс-шарасы «Сыр ана» монументінің жанында өтті. Оған облыстық қоғамдық даму басқармасының басшысы Руслан Қаюпов, жастар ұйымдарының өкілдері, еңбек жасақтарының жетекшілері мен белсенді жастар қатысты.
«Жасыл ел» еңбек жасақтарының құрамы бекітілген маусым бойы елді мекендерді абаттандыру, көгалдандыру, санитарлық тазалық жұмыстарын жүргізу және қоғамдық орындарды күтіп-ұстау бағытында еңбек етті. Жас буынның белсенділігі өңірдің көркеюіне және қоршаған ортаның тазалығын сақтауға өзіндік үлесін қосты.
Жиында сөз алған Руслан Мұхамедәліұлы жастардың қоғамдық жұмыстарға белсенді араласуының маңыздылығына тоқталды.
– Жастар – елдің ертеңі ғана емес, бүгінгі қоғамның белсенді күші. Еңбекпен шыңдалып, туған жердің тазалығы мен көркеюіне үлес қосу – азаматтық жауапкершіліктің белгісі. «Жасыл ел» – жастарға еңбек етуге, ортақ іске жұмыла кірісуге және ел игілігіне өз үлесін қосуға мүмкіндік беретін маңызды бастама. Сіздердің еңбектеріңіз – туған жерге деген жанашырлықтың нақты көрінісі», – деді Р.Қаюпов.
Мемлекеттік деңгейде жүзеге асырылып жатқан «Таза Қазақстан» экологиялық акциясына орай өткен жылы ұйымдастырылған «Жасыл ел» жасағы осы уақыт аралығында жемісті жұмыс атқарды. Айта кетейік, Қызылорда қаласы мен аудандарда 30 бригада еңбек етті. Жастардың қатысуымен облыс көлемінде орналасқан мәдени-демалыс орындарында (аллея, сквер, алаңдар, парктер) көгалдандыру, абаттандыру жұмыстары жүргізіліп, экологиялық мәдениетті арттыруға бағытталған түрлі тақырыптағы іс-шаралар өткізілді.
Қорытынды іс-шарада еңбек маусымында белсенділік танытып, қоғамдық жұмыстарға жауапкершілікпен қатысқан жастардың еңбегі атап өтілді. Туған жердің тазалығы мен көркеюіне атсалысып, еңбек маусымында белсенділік көрсеткендерге аймақ басшысының Алғыс хаты табысталды.
«СБ» ақпарат
