Өңірімізде 975 нысанда медициналық қызмет көрсетіледі. Оның 783-і – жеке меншік, қалғаны – мемлекеттік. Ал фармацевтикалық қызметпен 536 нысан айналысады.
ҚР ДСМ Медициналық және фармацевтикалық бақылау комитетінің Қызылорда облысы бойынша департаментіне биыл 6 айда медициналық және фармацевтикалық қызмет көрсету саласына қатысты 340 арыз-шағым түскен. Бұл өткен жылғыдан 19,3 пайызға көп. Қызмет алушыларды көбіне медициналық көмектің сапасы (40,6 пайыз) мазалайтыны белгілі болды.
– Халық денсаулығы және денсаулық сақтау жүйесі туралы кодекстің талабына сәйкес денсаулық сақтау субъектісінің қызметкерлері медициналық қызмет түрін жүзеге асырғанға дейін кәсіптік жауапкершілік бойынша ортақ сақтандыру шартын жасасуға міндетті. 2024 жылғы 23 қазаннан кейінгі болған жағдайлар бойынша департаментке түскен жолданымдар тиісті медициналық ұйымдарға бағытталды. Өткен жылы және биылғы жартыжылдықта 80 жолданым медициналық ұйымдарға жіберілді. Тәуелсіз сарапшылар комиссиясының шешімімен 5 жағдайдың 4-і үшін сақтандыру өтемақысы төленді, – дейді департамент басшысы Жанерке Жақсылық.
Одан бөлек процедуралық, стоматологиялық кабинеттер мен медициналық ұйымдарды тексеру нәтижесі жарияланды. Тексеру барысында тегін медициналық көмектің кепілдік берілген көлемі және МӘМС аясында халыққа медициналық қызмет көрсетуге арналған бюджет қаражатын, қор активтерін, стоматологиялық көмек бойынша БЖЗҚ аясында халыққа медициналық қызмет көрсетуге арналған бюджет қаражатын пайдалану мен жұмсау заңдылығы ескерілді.
– Қорытындысында 155 әкімшілік іс қозғалып, 21 млн 784 мың теңгеден астам айыппұл салынып, мемлекет пайдасына толық өндірілді. Өткен жылы облыстық полиция департаментінен «Дәрмек» жедел-профилактикалық іс-шарасы аясында 32 іс материалы түскен, 7 әкімшілік іс қозғалды. Қалған істер құжаттың жеткіліксіз болуына байланысты, күшті әсер ететін, есірткі, психотропты, прекурсорларға жататын дәрілік заттар болмағандықтан қайтарылды, – деді департамент басшысы.
2024 жылдың 1 шілдесінен бастап елімізде дәрілік заттарды міндетті таңбалау енгізілді. Ондағы мақсат – дәрі-дәрмектің өндірушіден пациентке дейінгі жолын қадағалау. Әрбір дәрілік заттың қаптамасында Data Matrix коды қолданылады. Таңбаланғаны тауарларды таңбалау және қадағалау ақпараттық жүйесі арқылы тіркеліп, қадағаланады. Ақпараттық жүйенің мәліметіне сәйкес аймақта 8955682 қаптама дәрілік зат кіріске алынған, 6817393 қаптама дәрілік зат айналымнан шығарылған. Бұл – жалпы көрсеткіштің 76,2 пайызы.
Назерке САНИЯЗОВА,
«Сыр бойы»
