Елімізде жыл сайын дәстүрлі түрде өтетін «Жұлдызай» республикалық балалар шығармашылығы фестивалінің басты мақсаты – ерекше білім беру қажеттіліктері бар балалардың жан-жақты дамуына жағдай жасау.
Бұл фестиваль әрбір баланың даралығын, шығармашылық қабілетін танытып, өнер мен талантын бағалауға мүмкіндік береді. Сонымен қатар олардың қоғамдық өмірге белсенді араласуына да жол ашады.
Биыл бұл мерейлі шара өзінің 20 жылдық мерейтойын атап өтті.
«Жұлдызай-2024»-тің гран-при жеңімпазы «Іңкәр» тобы арнайы шақыртылды.
2005 жылдан бері өткізіліп келе жатқан фестиваль талай ерекше баланың үмітін оятып, болашаққа сеніммен қарауына себепші болды. Фестиваль – жай ғана байқау емес, ол – шынайы шабыт пен жігердің, мейірім мен қолдаудың алаңы.
Мерейтойлық фестиваль аясында республика бойынша 100 мыңнан астам қазақстандық ерекше балалардың өнерін тамашалап, өз таңдауларын жасап, дауыс берді.
Жалағаш ауданындағы әл Фараби атындағы №201 мектеп-лицейінің 10-сынып оқушысы Қартаңбай Айдана ІІ орын иеленсе, №5 көру қабілеті бұзылған балаларға арналған мектеп-интернатының оқушылары Бостандықұлы Оразбек, Ермахан Лиза және Қызылорда қаласы А.Хангельдин атындағы №179 орта мектебінің оқушысы Молдағали Азиз ІІІ дәрежелі диплом иегері атанды.
«Жұлдызай» фестивалі – жүрекке жылу сыйлайтын, үмітке қанат бітіретін, ерекше балалар үшін үлкен сахна мен мүмкіндіктер есігі. Мұндай бастамалар қоғамның инклюзивті болашағына нық қадам болып, әр баланың шексіз мүмкіндіктері бар екенін тағы бір дәлелдеді.
Айгерім САУҚЫНБАЕВА
