Базарбай ағамыздың Қызылорда облысының медицина саласына, оның ішінде жұқпалы аурулармен күреске сіңірген еңбегі өте зор. 1988 жылдың 30 желтоқсанында облыстық жұқпалы аурулар ауруханасын қабылдап алды, ол кезде облыстық денсаулық сақтау басқармасы басшысының бірінші орынбасары болып қызмет істейтін.
1989 жылдың 6 қаңтарында мені өзінің орынбасары етіп тағайындады. Бірақ аурухананың ауруларды қабылдауға дайындығы жоқ еді, құрылыс жұмыстары әлі жалғасып жатты, төсек-орын, аппараттары әлі алынбаған.
Жаңа басшының қатысуымен сол жылдың маусым айына дейін құрылыс толық бітті, ауруханына төсек-орынмен, қажетті құралдармен жабдықтады. Облыстағы 3 аурухана: Қызылорда облыстық ауруханасының, қалалық аурухананың, балалар ауруханасының инфекция бөлімдерін көшіріп, облыстық жұқпалы аурулар ауруханасы науқастарды қабылдап бастады.
Үш мекемеден келген ұжымның басын біріктіру ұйымдастырушылық қабілетке байланысты. Реанимация бөлімі, кейіннен бактериология-серологиялық зертхана ашылып, штаттарын кеңейтіп 1 дәрігердің орнына 6 дәрігер маман дайындатты, Қызылорда қаласындағы және аудандардағы аурухана, емханаларда бактериология-серологиялық зерттеу жүргізетін орталықтандырылған зертханалар ашты. Бұрын болмаған реанимация бөлімін құрып, облыстық ауруханадан Жақсылық Сәрсенбаевты шақыртты.
Қызметкерлерге өте қамқор еді. Тоқырау кезде, ауыр заманда әкімдікке өтініш айтып, әуежай жақтан жер сұрап картоп, жуа, басқа да көкөністер, бау-бақша егіп, солай 3-4 жыл аурухана өз күнін өзі көрді. Кадрларды өте жақсы бағалайтын, шындықты бетке айтатын. 2000 жылы зейнетке шығам дегенше мамандар дайындап, әрі қарай өзі аурухананың ұйымдастыру бөлімінің меңгерушісі болып қызмет жасады.
Қарамағындағы 1-2 дәрігерге көпқабатты үйден баспана алуға көмек көрсеткен. Аурухана жанынан жер бөлдіріп, 12 орта буынды қызметкерге жер алып берген. Жолдас-жорасы өте көп, ортада сыйлы кісі еді. Шәкірттерінің көбісі кейіннен облыс көлемінде бас дәрігер қызметтеріне көтеріліп, зейнетке шықты. Республика көлеміне, үлкен қызметке көтеріліп кеткендер де бар. Олар Базарбай ағаның тәрбиесінің арқасында жақсы маман болып шықты. Кейбір шәкірттері Астана, Алматы қалаларында доктор, профессор. Отбасылық дос болдық, жақсы ұрпақ тәрбиелеген, балалары да елге қызмет етуде.
Сол кісі тәрбиелеген мамандар ұйымшылдығын сақтап келеді, қызметтеріне адал. Зейнетке шыққан кісілерді де назардан тыс қалдырмай, үнемі шақырып, құрмет көрсетуде.
Ол дүние жинаған жоқ, дос жинады. Достары республика көлемінде, тіпті шет елдерде де көп еді. Базарбай ағаның арқасында көптеген жақсы кісілермен таныстық, дастарқандас болдық, әңгімелерін тыңдадық.
Тағы бір жақсы қасиеті, қарамағындағыларды қорғай білетін, жазықсыз біреудің айыптауына, жазалауына жол бермейтін, ашуы тез қайтатын, артынша татуласуға тырысып, қажет болса үлкен-кіші демей кешірім сұрайтын. Сол қасиеттерін жоғары бағалайтынбыз.
Ол кісінің аурухана маңын көгалдандыруға да қосқан үлесі зор. Құрылыс біткен кезде айналасы тас, құм, топырағы құнарсыз еді, су болмады. Жыл сайын тал ектіретін, қазір сол ағаштар жайқалып, үшінші қабатқа дейін жетіп тұр.
Жалғас КҮДЕБАЕВ,
медицина саласының ардагері
