Үкімет басшысы Әлихан Смайыловтың төрағалығымен санитариялық-эпидемиологиялық жағдай және «Қуатты өңірлер – ел дамуының драйвері» ұлттық жобасын іске асыру барысы қаралған жиын өтті. Отырысқа онлайн режимде бірқатар министрлер мен барлық өңірдің әкімдері қатысты.
Жиында ведомоство басшылары тарапынан ауызсу желілері бойынша Қызылорда мен Павлодар облыстары оң нәтиже көрсеткен аймақтар қатарына енгенін атап өтті.
Үкімет отырысынан кейін облыс әкімі Нұрлыбек Нәлібаев жауапты сала басшылары мен қала, аудан әкімдеріне бірқатар нақты тапсырмалар жүктеді.
Аймақ басшысы алдымен өңірдегі эпиджағдайды қатаң бақылауға алып, вирустың жаппай таралуына жол бермеу бойынша шаралар қабылдауды тапсырды. Сонымен қатар «Қуатты өңірлер – ел дамуының драйвері» ұлттық жобасына қатысты жіберілген кемшіліктерге сын айтып, қала, аудандардағы жобалардың жұмыстарына жеке-жеке тоқталып, атқарылған істің мардымсыз екенін тілге тиек етті.
Ұлттық жоба аясында Қызылорда облысына биылға республикалық бюджеттен және Ұлттық қордан 22 млрд теңге қаржы бөлінді. 2022 жылдың 1 тамызына жылдық жоспардың игерілуі небәрі 33,8% ғана құрады.
Шағын қалаларды дамыту аясында 4 жобаны іске асыруға қаралған 348,5 млн теңгенің небәрі 72 млн теңгесі немесе жылдық жоспардың 20,8%-ы игерілген.
Мәселен, Арал мен Қазалы аудандарындағы 3 жоба бойынша құрылыс жұмыстары әлі басталмаған. «Ауыл – ел бесігі» жобасы бойынша да игерілу көрсеткіші төмен. Жаңақорған, Шиелі, Сырдария аудандары мен Қызылорда қаласында жылдық жоспардың игерлуі жартысына да жуықтамаған. Ең төменгі көрсеткіш Жаңақорған мен Шиелі аудандарында.
– «Нұрлы жол» және «Нұрлы жер» мемлекеттік бағдарламаларына бөлінген қаржының игерілуі де төмен деңгейде.
– Басқа өңірлермен салыстырғанда біз ең аз қаржыны алдық. 2022 жылы аймағымызға бөлінген аз қаржыны игермеу не кеш игеру – жұмысымызға үлкен сын. Құрылыс жұмыстарын жүргізу уақытына қолайлы 3 ай мерзім ғана қалды. Күн суытқаннан кейінгі жұмыстардың сапасы дұрыс болмайтындығы белгілі.
Сондықтан, жауапты басқарма басшылары, қала, аудандар әкімдері жетекшілік ететін салаларыңыз бойынша құрылыс-монтаж жұмыстарын 2-3 айдың ішінде аяқтау үшін шаралар қабылдаңыздар. Тез игеремін деп жұмыстың сапасы төмендеп кетпесін. Бақылауда ұстаңыздар, – деді Н.Нәлібаев.
>>> Біздің Facebook, Instagram парақшаларымыз бен Telegram каналымызға жазылыңыз! <<<
