Бүгінде еліміз бойынша COVID-19 вирусын жұқтырғандардың саны 14809-ға жетті. Оның ішінде 9188 адам аурудан айығып шықса, 77-сі қайтыс болды. Ал облыста 28 наурыздан 14 маусымға дейін коронавирус инфекциясының 625 жағдайы тіркелді. Аталған індет бойынша эпидемиологиялық ахуал тек біздің ел емес, дүние жүзінде күрделі.
Облыста соңғы уақытта қауіпті індет ілмегіне іліккендер арасында клиникалық белгілері бар науқастардың басым көпшілігі әртүрлі созылмалы ауруға шалдыққан. Сонымен қатар, орташа және ауыр жағдайда жан сақтау бөліміне түсетін науқастар саны да артып келеді. Осыған орай, жүрек-қан тамыры аурулары, қан қысымы жоғары және қант диабетімен ауыратын т.б. созылмалы сырқаттары бар егде жастағы азаматтар аса сақ болғаны дұрыс.
Дәл қазір жауапкершілікті сезініп, әрбіріміз сақтық шараларын қатаң ұстанып, оны күнделікті өмірде бұлжытпай орындауды үйреншікті қалыпты әдеттердің біріне айналдыруымыз керек. Індетті жұқтырып алмау үшін ең оңай, қарапайым ғана амалдарды сақтасақ жеткілікті. Бұл сақтық шаралары туралы күнделікті бұқаралық ақпарат құралдары, әлеуметтік желілер арқылы ақпараттандырылуда. Жұмыста, көлікте, көшеде, дүкенде және халық көп жиналатын орындарда мүмкіндігінше арақашықтықты сақтаңыз. Егер мүмкіндік болса, кеңседе емес, үйде отырып жұмыс істеуге тырысыңыз. Туыс, достармен онлайн, видео-қоңырау және өзге де жаңа технологиялардың көмегімен байланыс орнатыңыз. Қоғамдық орындарда, қоғамдық көліктерде маска киіп жүріңіз. Қолды кем дегенде 20 секунд сабынмен жиі жуып, құрамында спирті бар залалсыздандырғыш сұйықтықты пайдаланыңыз. Өзіңіздің және отбасы мүшелерінің дене қызуын жиі өлшеп тұрыңыз. Ал ауру белгілері байқалған жағдайда 103 арқылы медициналық жәрдем шақыртыңыз. Осы қарапайым ғана ережелерді орындасақ, ауруға дес бермес едік. Өйткені бұл шаралар наурыз, сәуір және мамыр айларында төтенше жағдай кезіндегі карантинде ауруды ауыздықтауға біраз көмектесті. Мамыр айының соңында карантин талаптары жеңілдегені белгілі. Осыдан кейін аурудың өсімі жоғарылап кетті. Бетперделік режим, әлеуметтік арақашықтық сақталмайды, той-жиындар әлі де жалғасуда. Сақтық шаралары өз деңгейінде емес. Соның салдарынан эпидемиологиялық ахуал күрделенуде.
Коронавирус пандемиясына байланысты әлем ғалымдары тарапынан түрлі болжам бар. Көптеген сарапшылар індеттің екінші толқыны болатынын айтып, дабыл қағып отыр. Ал Дүниежүзілік денсаулық сақтау ұйымы вирустың екінші толқыны жойқын болуы мүмкін екенін алға тартады. Сондықтан ДДСҰ мәліметінше, коронавирусқа байланысты енгізілген шектеулерді толық алып тастауға әлі ерте.
Ауру жас та, адам да таңдамайды. Мұны коронавирус инфекциясы бойынша күн сайын жарияланып жатқан ресми деректерден көріп отырмыз. Кәсіпкер, кәсіпорын мен медицина мамандары, мемлекеттік және БАҚ қызметкерлері арасынан індет жұқтырғандар қатары артуда. Сондықтан, баршаңыздан «жеке карантин» ережелерін қатаң сақтауды сұраймын. «Ауырып ем іздегенше, ауырмайтын жол ізде» дегендей, аурудың алдын алу шараларына мұқият мән берейік.
Әлия ӘБДІҚАЙЫМОВА,
облыстың Бас мемлекеттік
санитариялық дәрігері.
>>> Біздің Facebook, Instagram парақшаларымыз бен Telegram каналымызға жазылыңыз! <<<
