Адам баласының саулығы мен саламатты өмір сүруі – мемлекет ұстанып отырған басты саясаттың бірі. Сонымен қатар, ХХІ ғасырда әлемдік медицинаның мүмкіндігі арта түсті. Осыған орай мемлекет деңгейінде аталған саланы дамытудың жаңа бағыттары айқындалды. Халықтың талабы мен таңдауына сай уақыттың өзі мықты мамандарды алға шығарды. Бойында білімі мен қабілеті бар мамандар жеке кәсіп ашып, қызмет көрсете бастады. Бұл саладағы бәсекелестікті арттырып, жұмыс сапасының жақсаруына да сеп болды.
Дәрігердің алдына дертіңе дәру, жаныңа шипа іздеп барасың. Ондай кезде абзал жанның мейірімді жүзі мен жылы сөзі де адамның бойында ауруды жеңуге деген сенім қалыптастырады. Иә, қиын да жауапты қызметімен көптің көңілін тауып, алғысына бөленіп жүрген осындай жандардың бірі – жоғары санатты, білікті дәрігер Дүйсенкүл Тәжікова. Оның бұл салада еңбек етіп келе жатқанына қырық жылға таяды. Осы уақыт аралығында өз мамандығынан мол тәжірибе жинап, халыққа қалтқысыз қызмет етіп келеді. Бүгінгі таңда ол басқаратын жеке стоматологиялық орталық емдеу әдісінде медицинаның соңғы жаңалықтарын кеңінен қолданып, емделушіге барынша сапалы қызмет көрсетуді меңгерген.
Дүйсенкүлдің арманы дәрігер болу еді. Шындығында, оның биязы әрі нәзік болмысы, адам баласының бәріне мейіріммен қарайтын жанашыр мінезі тек дәрігер болуға жаралғандай. Алайда бұл міндеттің жауапкершілігі де оңай емес. Осының бәрін ой елегінен өткізе келіп, 1981 жылы Алматы мемлекеттік медициналық институтына «дәрігер-стоматолог» мамандығы бойынша оқуға түсті. Оқу орнын 1986 жылы бітіріп, 1986-2006 жылдар аралығында Шиелі аудандық емханасына қызметке орналасты. Осы ортада көп жыл еңбек етіп, мамандығының қыр-сырын терең меңгерді.
Осылайша, көп жылдық тәжірибесінің арқасында 2004 жылы аудан орталығынан, араға жылдар салып облыс орталығынан «Алма Дент Сервис плюс» жекеменшік стоматологиялық кабинетін ашты. Бүгінде бірнеше маманы бар тіс емдеу орталықтары жаңа технологиямен жабдықталған. Онда заманға лайықты материалдармен тіс жегіні пломбалау, зақымдалған тістерді емдеп, жаңа материалмен қаптау, қарт кісілерге протез салу, балаларға тегін медициналық көмек көрсету, сол сияқты аурудың алдын алуға байланысты көптеген профилактикалық жұмыстар атқарылады. Дәрігер бұл жұмыстарға жас мамандармен бірге қызы Алманы да баулыған. Бүгінде ол кәсіби тұрғыда қалыптасып, өзіне қолдау көрсетіп келеді.
Иә, халыққа қалтқысыз қызмет көрсетіп келе жатқан білікті дәрігердің еңбегі бағаланып, әр жылдары ҚР Денсаулық сақтау істері жөніндегі агенттіктің «Құрмет Грамотасын», облыс әкімінің «Үздік кәсіпкер әйел» жүлдесін иеленсе, «Қазақстан стоматологтары ассоциациясы» қоғамдық бірлестігінің «Құрмет грамотасымен» марапатталды. Республикалық «Ұстаз жолы» қоғамдық қорының шешімімен денсаулық сақтау саласындағы елеулі еңбегі үшін «Алтын дәрігер» төсбелгісін иеленді. Облыстық денсаулық сақтау басқармасының ұсынуымен 2008 жылы Алматы қаласында өткен дәрігер-стоматологтардың IV съезіне делегат болып қатысты. Ал 2018 жылы Алматы қаласының білікті дәрігер-профессорларын шақырып, облыс көлемінде алғаш рет стоматологтар арасында мастер кластар өткізді.
Иә, біле білсек, мамандығына шын берілген дәрігер халық денсаулығын сақтап, салауатты өмір салтын қалыптастыруға саналы ғұмырын арнайды. Дәрігер Дүйсенкүл Тәжікова да сондай жандардың бірі. Дәлірек айтсақ, мамандығына мансап деп қарамайды, адамгершілік парызым деп біледі. Кәсібіне жүгінген көп жандардан ақыл-кеңесін аямайды. Осындай ұстанымымен ол әріптестерінен бөлек, қарапайым тұтынушының да құрметіне бөленіп келеді.
Таяуда ғана Шиелі ауданы орталығынан ашылған жаңа тіс емханасы – оның ұзақ жылдар бойғы тынымсыз ізденіске толы жұмысының жалғасы. Иә, кей адамдар «кәсіппен айналысу – қаражаты мол адамдардың ісі» деп ойлайды. Алайда адал еңбегі мен бойындағы тәуекелінің арқасында бүгінгі деңгейге қол жеткізген тіс дәрігерінің тәжірибесі – әріптестеріне үлгі. Білікті дәрігердің мақсаты – бүгінгі уақыт талабынан қалыс қалмай, үнемі жаңашылдыққа ұмтылып, жұмыстың тиімділігін арттыру. Сондықтан Дүйсенкүл Еркімбайқызы басқаратын антына адал, міндетіне жауапты мамандар адам денсаулығын сақтауда әрдайым абырой биігінен көрінетініне сенім мол.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<