Қазіргі ұшқыр заманда күнделікті күйбең тірліктің қармағына ілінбеген адам жоқтың қасы десе де болатын шығар. Түрлі мекеме қызметкерлері, кәсіпорын жұмысшылары мен өз кәсібін дөңгеленткен әрбір адам таңның атысымен жаппай жұмыс орындарына асығатыны сөзсіз. Оларды былай қойғанда, үйдегі зейнеткерлер, біз де қарап отырғымыз келмей, мүмкіндігінше отбасымызға үй шаруасында аз да болса көмектесуге тырысамыз. Бірақ, өз шама-шарқымызды ескермегендіктен бе, әлде жас ұлғайғандықтан ба, соңғы кезде денсаулық сыр беретін болып жүр.
Жақын арада аяқастынан бастың ауыруына балтырдың сыздауы қосылып мазаны қатты ала бастаған соң, балам жедел жәрдем шақырып, көпбейінді облыстық аурухананың эндокринология бөлімшесіне жатқызды.
Көп уақыт өтпей палатаға өзін Елена Павловнамын деп таныстырған дәрігер келіп, жағдайымды егжей-тегжейлі толық сұрап білген соң, қажетті медициналық сараптамалар жасалғаннан кейін арнайы ем-шаралар басталатынын айтты. Түрлі анализдер алынған соң мейіргер қыздар бірден аспа дәрі салуды бастады. Ем-шара барысында мейіргер қыздарым қайта-қайта келіп, жағдайымды біліп, ерекше ықылас білдірді. Келесі күні таңертең науқастарды аралау кезінде емдеуші дәрігерім жағдайымды, тағы не мазалайтынын сұрап алған соң, организмді қосымша тексерулерден өткізу қажет екенін ескертті. Таңертеңгі ем-шаралардан кейін, мейіргер қыздарым бірнеше күн бойы түрлі салалық мамандарға апарып арнайы тексерулерден өткізді. Содан соң ем-шаралар тіпті көбейді, дәрігерім Елена Павловна күн сайын, кейде 2 мезгіл соғып, күлімсіреп отырып емнің қалай әсер етіп жатқанын біліп отырды. Кәсіби маманның және мейіргер қыздарымның тынбай жасаған ем-домының арқасында 4-5 күннен кейін өзімді бұрынғыдан жақсы сезіне бастадым.
Емделу барысында басқа емделушілермен сөйлесіп, бөлімшедегі ахуалға назар аудардым. Сондағы байқағаным: бұл бөлімше негізінен қант диабетімен ауыратын науқастарды, одан бөлек ағзадағы және қандағы төтенше өзгерістері бар, түрлі дәрежеде уланған науқастарды емдейді екен. Менімен бірге 4-палатада жатқан қант диабетімен ауырып жүрген қызылордалық Айбол Кеңтанов, кейін оның орнына келген, қиналып түскен Сахи Көшеров деген жігіттер, 1-палатадағы жағдайы ауырлау болып түскен Мұрат Әнуарбекұлы, 5-палатадағы Ишанкүл Бекмырзаева мен қаракеткендік Ажар Үргенішбаева, түскеніне 3 күн болған 10-палатадағы Евгения Серебрякова, тағы да басқа облысымыздың әр тарапынан келіп ем қабылдап жатқан кісілердің басым көпшілігі жылма-жыл осы бөлімшеде қаралып, денсаулықтарын түзетіп жүргенін айтты. Дәрігерлер мен мейіргерлердің кәсіби қызметіне, жан жылытарлық ықылас-пейіліне ерекше ризашылықтарын білдіріп жатты. Ал 10-палатада жатқан байқоңырлық 80 жастағы өңіріміздің тарихынан хабары мол Дәметкен Дәуітова әже (Байқоңыр қаласының әскери госпиталында медсестра болып істеп зейнетке шыққан) емдеуші дәрігері Еленаның өзімен емен-жарқын әңгімелескенін айтып, ем жасап жатқан әріптес қыздарының ықылас-пейіліне көңілі толды.
Өмірде әр мамандықтың өз ерекшеліктері бар ғой, алайда бір жеріміз ауырып, қиналғанда жүгіретініміз де, жүгінетініміз де – дәрігерлер.
Бұрын да әр жерде емделіп жүрміз, дегенмен облыс халқының денсаулығын сақтаудағы қазіргі көпбейінді облыстық аурухананың орны анағұрлым бөлек екені жұртқа мәлім.
Эндокринология бөлімінде ең бастысы, ұжым мүшелері арасында ерекше түсіністік ахуалы қалыптасқан. Содан да болар, ғимарат ішінен қатты дыбыс не басқадай абыр-сабыр әрекетті байқамайсыз. Жоғары санатты эндокринолог дәрігерлер Елена Цхай мен Меруерт Бодықова, невропатолог Данара Махатова, гематолог Ләззат Шүкірова, токсиколог Сұлтан Бағлан өз науқастарының жағдайларын тексеріп, қарап, көрсетілетін ем-шараларды күн сайын белгілеп беріп жатады. Енді сол ем-шараларды жоғары санатты аға мейіргер Жанар Байұлованың басшылығымен, өздерінің кезегі бойынша мейіргер қыздарым Айнұр Олинова, Нұргүл Таңатқанова, Динара Нұржанова, Дина Оспанова, Эльмира Егембаева, Сәуле Қалымбетова, Ақтоты Күзембаева, Сәлима Сержанова, Ұлтай Бақытжан мен физкабинеттің мейіргерлері Эльмира Қыдырәлиева, Айнұр Сыздықова тыным таппастан, түрлі жағдайдағы науқастардың тілін тауып, кәсіби біліктілікпен, ерекше жылылықпен атқарып жатқанын көріп, іштей риза күйде боласыз. Бөлімше, науқастарға белгіленген дәрі-дәрмектің аты, дозасы, саны, науқастың аты-жөні, қолданылатын күні мен уақыты көрсетілген QR-коды бар компьютерде терілген қалташа дайындап, оған дәріні салып, желімдейді және оның сыртына кімнің дайындағаны көрсетіліп, оны уақытылы науқастың орнына апарып қояды. Осы мәліметтерді науқастардың медициналық картасына енгізетін де, оның көшірмесін жасап, емін алып болған науқастарға табыстайтын да, науқастарды көрінетін не тексерілетін орындарына арбамен немесе ертіп апаратындар да осы қыздарым.
Тағы бір көңіл қуантарлық жағдай – бөлімше ғимараты ішінің тазалығы. Аумағы біраз жер, 13 палатадан бөлек, дәрігерлер мен ем-шара бөлмелері, қаншама қосалқы, санитарлық, оған қоса келесі бөлімшеге дейінгі кірер ауыз, осының барлығын кезектесіп, күні-түні бір тынбай мұнтаздай етіп тазартып, ем алушыларға қолайлы жағдай жасап жатқан Әлия Қазтуғанова, Гүлнар Наурызбаева, Гүлстан Жылқышиева, Зылиха Айтуғанова, Гүлмира Алшынбаева, Гүлзира Исабек, Ақсұлу Төлепова, Олимпиада Шөлтікова сияқты қарындастарымыз бен қыздарымыздың арқасы ғой. Жағдайы ауырлау не жүруі қиындау емделушілерге үш мезгіл тамақтарын жеткізіп беруші Бағлан Рахменованың да еңбегі атап айтуға тұрарлық. Мен тек өзім көріп-білген, байқаған жайларымды ғана сөз еттім, ал бөлімшенің жай көзге байқала бермейтін жұмыстары мен ем-шараларының көп екеніне күмәнім жоқ.
Ендеше осыншама тірлікті мінсіз атқаруға бөлімше ұжымын жұмылған жұдырықша ұйыстырып, олардың әрқайсының білім жетілдіріп, кәсіби шеберлік шыңдауына, бір-бірімен ың-шыңсыз ұғысуына, тату әрі сыйластықпен бірігіп еңбек етуіне жағдай жасаушы, әрине өз ісінің нағыз білгірі, облыстық аурухананың ғана емес, бүкіл облыстағы денсаулық сақшыларының алдыңғы сапынан табылып жүрген Елена Павловна Цхай екеніне емделушілер куә болдық.
Ақ халатты абзал жандардың кәсіби мерекесінде «сіздердің көмектеріңіздің арқасында өз отбасымда, жақын жандарымның ортасында жарқын көңіл күйде жүріп жатырмын. Сіздер қаншама адамды науқасынан айықтырып, көбінің үмітін жалғап, жақсы күндерге жетелеп, отбасы мен елі үшін еңбек етуіне жол ашып жатырсыздар.
Осындай айрықша қызметтеріңізде жемісті де жеңісті сәттеріңіз көп болсын! Отбастарыңызға Ұлы жаратушымыз қайырлы, құтты, мерейлі әрі бақуатты тірлік кешулеріңізді бұйыртсын!
Айналайын, ақ халатты
жандарым,
Ата берсін арайланып
таңдарың.
Науқастарға шипа болып
емдерің,
Алғыс болсын, әрқашан алғандарың! – деп тілек айтамын.
Мұратбек ӘДЕТ,
ардагер-ұстаз.
«Құрмет» орденінің иегері
