Табиғат берген талантымен танылып, ән әлемінде өзіндік орнын тапқан әнші Үміт Медеуованың есімі ел ішінде кеңінен танылған. Әсіресе, халық әндерін ерекше сүйіспеншілікпен орындайтын ол көпшіліктің сүйікті әншісіне айналды. Сыр бойының тумасы, сыршыл да салиқалы болмысымен дараланып тұратын өнер өкілі, Мәдениет саласының үздігі Үміт Медеуова биыл 60 жасқа толды.
Жасынан өнерге жаны құштар ол Шымкент қаласындағы әл Фараби атындағы педагогикалық институтты «Халық аспаптар бөлімінің жетекшісі» мамандығы бойынша бітірді. Студенттік жылдарында институт жанынан құрылған «Достық» ансамблінің құрамында болып, түрлі байқауларға қатысып, бірнеше шетелдік гастрольдерде өнер көрсетті. Оқуын бітірген соң жолдамамен Қызылорда қаласындағы «Бумажник» мәдениет үйіне үйірме жетекшісі болып орналасты.
Өнер жолына бет бұрған жастардың қабілетін шыңдап, қатарға қосу үшін көп еңбек, әсіресе, талап пен талғам қажет. Осындай жауапты міндетті өз деңгейінде атқарып, тәжірибесін толықтырған жас маман облыстық халық шығармашылығын дамыту орталығына ауысып, бөлім меңгерушісі қызметін атқарды. Осы жылдары ол «Қазына» фольклорлық ансамблінің құрамында әнші-термеші ретінде танылған еді.
Өңірдің мәдениет саласында қырық жылдай еңбек етіп, жас толқынға мол тәжірибесімен үлгі бола білген Үміт Медеуованың Сыр өнерінің дамуында сүбелі үлесі бар. Осы уақыт аралығында өнер жолынан өз биігін бағындырып, халықтың қалтқысыз құрметіне бөленді. Айталық, осыдан он жыл бұрын, яғни, 2006 жылы Н.Бекежанов атындағы облыстық қазақ академиялық драма театрында ең алғашқы есеп беру концертін өткізсе, одан кейін әр жылдары «Ақмешіт аспаны», «Сыр сазы» атты жеке концерттері, «Жылы жүздесу. Бенефис» жобасымен шығармашылық кеші өтті. Сондай-ақ бүгінде облыс өнерпаздарының құрамында республика көлемінде, әлем елдерінде өткен көптеген мәдени шараға қатысып, үздіксіз өнер көрсетіп келеді.
Әншінің өзіне хабарласып, облыстық газет оқырмандары атынан құттықтауымызды жеткізіп, шығармашылығы жайлы сұраған едік.
– Мерейлі жасыма орай Премьер-министрдің бірінші орынбасары Нұрлыбек Нәлібаевтан бастап, әріптестерім, жалпы өнердің айналасында жүрген жандар құттықтау жолдады. Баршасына алғыс білдіремін!
Сонау он тоғыз-жиырма жасымнан бері Сыр өнерімен бірге жасап келемін. Қазір де облыстық филармония әншісімін. Халық әндерімен қатар, қазақ композиторларының, Сыр бойы сазгерлерінің шығармаларын орындап жүрмін. Негізі, дәстүрлі жанр жаныма жақын. Бірақ репертуарымда лирикалық, патриоттық әндер де бар. Уақыт ағымына қарай өнерге деген талғам да өзгеріп отырады. Сондықтан үнемі ізденісте жүремін. Орайы келсе, өнерсүйер қауымға жаңа дүние ұсынуға тырысамын, – дейді әнші.
Ерекше дарынымен елдің жүрегіне жол тапқан әншінің өнердегі жетістіктері де аз емес. Нақтырақ айтсақ, 2004 жылы өткен республикалық К.Әзірбаев атындағы әншілер конкурсының дипломанты атанды. Ал 2008 жылы музыка өнерінің дамуына қосқан қомақты үлесі үшін ҚР Мәдениет және ақпарат министрлігінің «Музыка өнерінің үздігі» атты Құрмет грамотасымен марапатталса, 2011 жылы «Мәдениет қайраткері» атағын иеленді. Осы жылы өңір мәдениеті мен өнерінің өсіп-өркендеуіне қосқан лайықты еңбегіне орай облыс әкімінің стипендиясын жеңіп алды.
2019 жылы ҚР Тәуелсіздігі күніне орай Мемлекет басшысы Қ.Тоқаевтың «Құрмет грамотасымен» марапатталса, 2024 жылы облыс әкімінің әдебиет және мәдениет өкілдеріне арналған «Тұран» сыйлығын иеленді. Ал өткен жылы өнердің белді өкілі Үміт Медеуова Президент Жарлығымен, «Құрмет» орденін кеудесіне тақты.
Әлбетте, бұл – әншіге деген халықтың құрметі!
Ғазиза ӘБІЛДА,
«Сыр бойы»
