Аудандарда кәсіп жүргізіп жүрген азаматтар мемлекеттік қолдау тетіктері жөнінде кеңес алу үшін облыс орталығына арнайы келмей-ақ, қажетті ақпаратты өз ауданында ала алады. «Даму» кәсіпкерлікті дамыту қорының мобильді фронт-офисі бекітілген кесте бойынша аудан орталықтарына барып, жергілікті кәсіпкерлерге кеңес беріп келеді.
«Даму» кәсіпкерлікті дамыту қорының ақпараты бойынша, мобильді фронт-офистер жобасы Мемлекет басшысының шағын және орта бизнесті қолдау шараларымен қамту жөніндегі тапсырмасы аясында Үкіметтің қолдауымен жүзеге асырылуда. Бастама биыл наурыз айында жарияланып, шілде айынан бастап Қызылорда облысында нақты жұмысын бастады.
Жобаның басты мақсаты – аудан кәсіпкерлерінің мемлекеттік қолдау бағдарламаларына қол жеткізуін жеңілдету. Бұған дейін кеңес алу немесе қаржыландыру тетіктері жөнінде толық ақпарат білу үшін Қызылорда қаласына келуге тура келсе, енді мамандар аудан орталықтарына өздері барады. Бұл кәсіпкерлердің жолға жұмсайтын уақыты мен шығынын азайтып, қажетті қызметті тұрғылықты ауданына жақын жерден алуына мүмкіндік береді.
Мобильді топ құрамында «Даму» қорының консультанттарымен бірге жергілікті атқарушы органдардың, «Атамекен» Ұлттық кәсіпкерлер палатасының және екінші деңгейлі банктердің өкілдері жұмыс істейді. Мамандар аудан орталығында кәсіпкерлерді қабылдап, бизнесті бастау, жобаны кеңейту, несие рәсімдеу, кепілдік алу және мемлекеттік бағдарламаларға қатысу мәселелері бойынша түсіндіру жұмыстарын жүргізеді.
Кездесу барысында әр кәсіпкер өз жобасына қатысты сұрағын қойып, жеке кеңес ала алады. Сондай-ақ мамандар қолданыстағы бағдарламалардың талаптарын, қажетті құжаттарды әзірлеу тәртібін және өтінім беру кезеңдерін түсіндіреді. Кейбір қолдау бағыттары бойынша өтінімдерді аудан орталығында қабылдау мүмкіндігі де қарастырылған.
Қызылорда облысында мобильді фронт-офистің сапарларымен барлық жеті аудан орталығын қамту жоспарланған. Шілде айында басталған қабылдаулар қыркүйекте қайта жалғасады. Осыған байланысты өңір бойынша жаңа сапар бағыты мен кестесі әзірленеді. Әр ауданға бару мерзімі алдын ала жарияланып, кәсіпкерлер белгіленген күні аудан орталығындағы қабылдауға қатыса алады.
Кәсіпкерлерге несие бойынша пайыздық мөлшерлемені субсидиялау, кепіл мүлкі жеткіліксіз болған жағдайда кепілдік беру, жеңілдетілген несие мен лизингтік қаржыландыру алу мүмкіндіктері түсіндіріледі. Сонымен қатар жаңа бастаған кәсіпкерлерге арналған микроқаржыландыру, экспорттық жобаларды қолдау, өңдеу өнеркәсібін дамыту, оқыту және жобаларды сүйемелдеу бағыттары бойынша ақпарат беріледі.
Мобильді фронт-офис арқылы кәсіпкерлер «Даму» қорының ғана емес, «Бәйтерек» ұлттық басқарушы холдингіне қарасты басқа да ұйымдардың қолдау құралдарымен таныса алады. Олардың қатарында Қазақстанның Даму Банкі, Өнеркәсіпті дамыту қоры, Экспорттық-кредиттік агенттік және Qazaqstan Investment Corporation ұсынатын бағдарламалар бар.
Бұл жұмыс әсіресе аудан кәсіпкерлері үшін тиімді. Өйткені көптеген азамат мемлекеттік бағдарламалардың мүмкіндіктері туралы толық біле бермейді немесе құжаттарды рәсімдеу барысында қиындықтарға кездеседі. Мобильді топ өкілдерімен тікелей жүздесу арқылы кәсіпкер өзіне қажетті қолдау бағытын анықтап, әрі қарай атқаратын қадамдары жөнінде нақты ақпарат алады.
Қызылорда облысының жеті ауданын қамтитын кезекті сапарлар қыркүйек айында өтеді. Аудан орталықтарындағы қабылдау орындары мен уақыты туралы ақпарат «Даму» қорының ресми сайтында және әлеуметтік желілердегі парақшаларында алдын ала жарияланады. Осылайша, аудан кәсіпкерлері облыс орталығына бармай-ақ, мемлекеттік қолдау шаралары жөніндегі кеңес пен қажетті көмекті өз аудан орталығында ала алады.
«СБ ақпарат»
