Қызылорда қаласындағы «Анаға тағзым» орталығында «Creative Battle: AI × Ұлттық қолөнер» сайысы өтті. Он саусағынан өнер тамған шеберлер онда дәстүрлі қолөнерді жасанды интеллект мүмкіндігімен ұштастырып жаңа өнім әзірледі. Жоба Сыр өңірінің брендтік ерекшелігін заманауи нарық талаптарына сай жаңғырту, жергілікті кәсіпкерлердің креативті идеяларын қолдау, ұлттық мәдени мұраны дамыту мақсатында ұйымдастырылды.
Сыр елі – ежелден ұлттық өнердің өрісі, қолөнердің қаймағы бұзылмаған қасиетті мекен. Жаһандану заманында көне мұраны сақтап қана қоймай, оны заманауи технологияның тілінде сөйлету – уақыт талабы. «Creative Battle: AI × Ұлттық қолөнер» сайысы өңірдің кәсіпкерлері мен жаңашыл жастары үшін нағыз шығармашылық алаңға айналды. Жобаның акселерациялық кезеңінде командалар клиент портреті мен эмпатия картасын жасауды, брендтің мәні мен құндылығын қалыптастыруды үйренді. Сондай-ақ жасанды интеллект көмегімен логотип, визуал және қаптама дизайнына арналған сұраныс құрастыруды меңгерді.
Дүбірлі доданың іріктеу кезеңінен бастап бәсеке көрігі қызды. Қатысушы командалар қазылар алқасына «Сырдан сый» тақырыбы аясында төл туындыларын Сыр өңірінің мәдени коды, тарихы және ерекшелігімен байланыстыра отырып таныстырды. Нәтижесінде сарапшылар шешімімен 9 команданың 6-ы суырылып алға шығып, финалдық кезеңге жолдама алды.
– Байқаудың форматында ерекшелік бар. Бұған дейін хакатон бөлек, баттл бөлек өтетін. Бұл жолы екі форматты біріктірдік. Хакатон 24 сағатқа созылса, бүгінгі сайыстың шарты бойынша шеберлер 4 сағат ішінде жаңа өнім әзірлеуге күш салды. Біз қолөнершілердің өз өнімін жарнамалап, жеке брендін қалыптастыруға, сатылым деңгейін арттыруға қолдау көрсетеміз. Осы мақсатта тегін сауда алаңдары ұйымдастырылып тұрады. Ынталы қолөнершілер қыркүйек айында Астана қаласында өтетін республикалық жобада тәжірибе алмасып, байқау барысында әзірлеген өнімдерін көбейтуге мүмкіндік алады, – деді «Анаға тағзым» орталығы директорының орынбасары Жанар Сағындықова.
Финалда қатысушылар экономикалық қызмет түрлерінің жіктелуіне сәйкес бірнеше маңызды бағыт бойынша бақ сынасты. Атап айтқанда, дайын тоқыма бұйымдары, ұлттық киім мен заманауи аксессуарлар, былғарыдан, ағаш пен табиғи материалдардан жасалған бұйымдар, керамикалық тұрмыстық және сәндік дүниелер, сондай-ақ көздің жауын алатын зергерлік заттар мен ерекше кәдесыйларды көрсетті.
Сайыстың тағы бір ерекшелігі, шеберлер дайын бұйымдарды қайта өңдеу арқылы мүлдем жаңа, креативті өнім жасап шығарды. Бұл бағыт қатысушылардың қиялы мен шеберлігіне үлкен қозғау салды. Бұл жай ғана қолөнершілердің көрмесі емес, өнер мен технология тоғысқан өндірістік майдан болды. Өйткені сайыс ережесі бойынша әр командада қолөнер шебері, дизайнер және ЖИ маманы бар. Олардың ортақ жұмысын бағалау кезінде қазылар алқасы өнімнің сыртқы келбетіне ғана емес, ерекшелігіне, жасалу техникасына, сапасына, қаптамасы мен көркем безендірілуіне, нарыққа шығарудағы маркетингтік құралдарды тиімді пайдалану деңгейіне баса назар аударды. ЖИ мамандары ұлттық ою-өрнектер мен дизайн элементтерін жасанды интеллект көмегімен түрлендіріп, жаңа заман трендіне сай бейімдеді.
– Командалар үлкен еңбек етті. Өзгермелі сөмке, кеудеше, ерекше балаларға арналған ойыншық сияқты өнімдерді назарымызға ұсынды. Ескі кілемге екінші өмір сыйлап, оны заманауи әрі трендтегі сөмкелерге айналдырған команданың жұмысы өзіме ерекше әсер сыйлады, – деді қазылар алқасының төрайымы, Креативті индустрияны дамыту қорының Қызылорда облысы бойынша өкілі Жанна Аманова.
Жоба қорытындысында жеңімпаздарды облыстық мәдениет, архивтер және құжаттама басқармасының басшысы Жанмұрат Сейілов марапаттады. «Сыр өрімі» командасы сайыстың бас жүлдесін иеленіп, 500 мың теңге көлеміндегі қаржылай сыйлықты жеңіп алды. «Тұмар» командасы І орынға лайық деп танылып, 250 мың теңге көлеміндегі қаржылай сыйлыққа қол жеткізді. ІІІ орын «Korik-AI» командасына, ІІ орын «Өрнек» тобына бұйырды. «Aydia» және «Creative queens» командалары басқарма басшысының алғыс хатына және естелік сыйлықтарға ие болды.
Назерке САНИЯЗОВА,
«Сыр бойы»
