Мемлекет басшысы Қасым-Жомарт Тоқаевтың тапсырмасына сай елімізде теміржол вокзалдары мен олардың инфрақұрылымын абаттандыру жұмыстары жүріп жатыр. Осы кезге дейін Қазақстанда 72 теміржол вокзалын реконструкциялау аяқталған. Бұл туралы Үкіметтің баспасөз қызметі мәлімдеді.
Жалпы Президент тапсырмасымен елімізде 124 вокзалды реконструкциялау бойынша ауқымды бағдарлама жүзеге асырылуда. Жұмыс вокзал инфрақұрылымын кешенді жаңғыртуды көздейді. Нақтырақ айтқанда, ғимараттар мен инженерлік желілерді жаңарту, платформалар мен вокзал маңындағы аумақтарды реконструкциялау, күту залдарын кеңейту, заманауи қауіпсіздік жүйелерін, лифтілер мен көтергіш құрылғыларды орнату, сондай-ақ кедергісіз орта құру қарастырылған. Ал барынша тозған нысандарда ескі ғимараттар толығымен бұзылып, орнына жаңа жолаушылар кешендері салынуда.
20 тамыздағы жағдай бойынша, Үкімет еліміздің 17 облысында 72 теміржол вокзалын реконструкциялауды аяқтады. Тамыз айының соңына дейін тағы 34 вокзалды пайдалануға беру жоспарда тұр. 15 нысанда жұмыс қыркүйек айының соңына дейін бітеді.
Жалпы биыл 124 вокзалдың 121-ін реконструкциялау көзделген. Тағы үш ірі нысан – Астана, Алматы және Түркістан вокзалдарындағы жұмыс 2027 жылы аяқталады. Олардың тарихи-архитектуралық құндылығы бар, сондықтан жұмыс ғимараттардың бастапқы сәулеттік келбетін сақтауға қойылатын талаптарды ескере отырып, жеке кесте бойынша жүргізілуде.
Айта кетейік, 2024 жылы 600 млн теңгеден астам қаржыға Қызылорда қаласындағы теміржол вокзалы ғимараты мен оған іргелес аумаққа күрделі жөндеу жүргізіліп, абаттандырылды. Республика бойынша қайта жаңғыртылатын 124 теміржол вокзалдың 10-ы облысымыздың еншісінде. Осы кезге дейін Қазалы, Шиелі, Жаңақорған, Сексеуіл теміржол вокзалдары мен «Талап» бекетіндегі жолаушылар платформасы халық игілігіне табысталды. Арал, Төретам, Жосалы теміржол вокзалдарын, Тереңөзек пен Жалағаштағы қызмет көрсету пункттерін пайдалануға беру кезең-кезеңімен аяқталады.
«Вокзалдарды жаңғырту инфрақұрылымды артып келе жатқан жүктемеге бейімдеуге және ірі тораптық стансалармен қатар өңірлерде де жолаушыларға қызмет көрсету сапасын арттыруды қамтамасыз етеді. Қабылданып жатқан шаралар теміржол инфрақұрылымының сенімділігін арттыруға, қызмет көрсету сапасын жақсартуға және жолаушылар үшін неғұрлым қолайлы жағдай жасауға мүмкіндік береді. Теміржол тасымалын дамыту және вокзалдарды жаңарту аясында жолаушылар ағынының одан әрі өсуі күтілуде, бұл көлік тораптарына жүктемені арттырады және қызмет көрсетудің заманауи стандарттарын сақтауды талап етеді» делінген мәлімдемеде.
«СБ» ақпарат
