Бұл мерекенің мән-маңызы ерекше. Әсіресе, кейінгі уақыттағы адамзат әлеміндегі ахуал ақ желеңді абзал жандарға құрметтің бағасын биіктете түсті. Медицина қызметкерлерінің кәсіби мерекесіне арналған салтанатты шарада облыс әкімі Гүлшара Әбдіқалықова күрделі кезеңде үлкен жауапкершілік танытып, шынайы жанашырлықпен еңбек еткен саулық сақшыларын құттықтап, жылы лебізін арнады.
– Әлемді жайлаған індет бізге медицина мамандарының қажеттілігін бұрынғыдан да артық сезіндіріп, мәртебесін көтере түсті. Сіздердің еңбектеріңіз шын мәнінде барлық құрметке лайық! Бұл орайда әлемдегі ең ізгі, ең қастерлі мамандық иелерінің қызметі мемлекет тарапынан жоғары бағаланып келеді. Әрине, ең жоғары баға – халықтың шынайы көңілі екені сөзсіз. Сындарлы кезеңде дертіне шипа іздеген әрбір жерлесіміз сіздерге дән риза деп білемін,–деді облыс әкімі.
Былтыр облыс бойынша вируспен күрескен 3 мыңға жуық медицина қызметкеріне 3 млрд теңге көлемінде үстемеақы төленсе, жиырмадан астам медицина қызметкері жоғары мемлекеттік наградамен, 107 қоғам белсендісі «Халық алғысы» медалімен марапатталды.
Облыс әкімі кәсібиліктің жоғары үлгісін көрсеткен бірқатар медицина мамандарын ҚР Денсаулық сақтау министрлігінің «Еңбек ардагері» медалімен, Ұлттық медицина ассоциациясының «Алтын дәрігер» төсбелгісімен, облыс әкімінің Алғыс хатымен, «Денсаулық сақтау ісінің үздігі» және «Денсаулық сақтау ісіне қосқан үлесі үшін» төсбелгісімен марапаттады.
Сондай-ақ, жиында «Біздің сүйікті дәрігер – 2021» конкурсының жеңімпаздары да құрмет төрінен көрінді. «Үздік денсаулық менеджері» номинациясын облыстық психикалық денсаулық орталығының бас дәрігері Әділбай Медетбаев иеленсе, «Үздік аурухана дәрігері» номинациясын Арал ауданаралық ауруханасының дәрігері Гүлжанат Төлепова жеңіп алды.
Қос марапат иесіне бір миллион теңгенің сертификаты табысталды. Ал, көпбейінді қалалық аурухана мейірбикесі Раушан Томанова «Үздік аурухана мейіргері» номинациясына лайық деп танылып, 700 мың теңге қаржылай сыйақыға ие болды.
– Бүгінде көпшілігіңіз пандемиямен күрестің алдыңғы шебінде жүрсіздер. Медицина қызметкерлерінің осындай қиын уақытта басымызға түскен ауыртпалықты жеңе алатынына сенеміз. Қазірдің өзінде еліміз бойынша ахуал жақсарып келеді. Өткен айлармен салыстырғанда елімізде індет жұқтырғандардың саны екі есе қысқарған. Республика бойынша өлім-жітім көрсеткіші 2 аптаның ішінде 1,6 есеге төмендеген. Аймақтарда ауруханаларда ем алып жатқан науқастар саны да азайған. Сіздермен кездесудің орайлы сәтін пайдалана отырып, өз тарапымыздан қалыпты өмір сүру дағдысына оралу үшін екпе салдырудың маңызды екенін атап өткім келеді. Вакциналау шарасына біздің медицина мамандарының өздері де бастамашы болады деп сенеміз, – деді облыс әкімі.
Салтанатты жиын соңында жергілікті өнерпаздар «Мың алғыс дәрігерлерге!» атты жаңа әнді шырқап, мереке иелеріне ерекше көңіл-күй сыйлады.
Айнұр Батталова,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
