Өңірде коронавирусқа қарсы екпе алғандар көбейді. Қазір бірлі-жарым тұрғындар ғана емес, ұжым мүшелері арнайы барып вакцина алуда. Себебі, індетті еңсерудің жолы – ұжымдық иммунитетті қалыптастыру. Бүгінде коронавирус құрсауындағы әлем елдері вакциналау қарқынын үдетті. Ел тұрғындарының да екпеге деген сенімі нығайып келеді.
Осы аптада Ассамблея мүшелері және «Қоғамдық келісім» мекемесінің қызметкерлері екпе салдырды. Вакцинаны салдырмас бұрын дәрігерлер әрбір адамның дене қызуы мен қан қысымын өлшеп, міндетті медициналық тексерістен өткізді.
Олар халық денсаулығын сақтап, қалыпты өмірге оралу үшін жұмыла күресуіміз керектігін айтты.
– Өзіңді және жақыныңды қауіпті індеттен қорғаудың әзірге жалғыз жолы – вакцина салдыру. Сондықтан да екпені ерікті түрде салдырдық. Ауырмайтын жол іздейік, – деді тіл жанашыры, «Абай қазынасына саяхат клубының» жетекшісі Елена Пак.
Оқу орындарының қызметкерлеріне вакцина егу жұмыстары да үздіксіз жүргізілуде.
Қорқыт ата атындағы Қызылорда университетінің ректоры, «Nur Otan» партиясы «Тұран» филиалының төрағасы Бейбіткүл Кәрімова бас болып, ректорат қызметкерлері, профессор-оқытушылар мен білім алушылар барлық санитарлық қауіпсіздік шараларын сақтай отырып коронавирусқа қарсы «Спутник – V» вакцинасын қабылдады.
Университет қабырғасынан вакциналауға арнайы екпе егу кабинеті бөлінген. Сондықтан бұған дейін вакциналанған университет қызметкерлері екпенің екінші науқанын алуда. Айта кету керек, екпе егілген қызметкерлердің барлығы дәрігерлердің жіті бақылауында.
Оқу орнының басшысы вакцина салу әр адамның өз қауіпсіздігі мен жақындарының амандығы үшін қажет екендігін айтып, азаматтарды вакцина салдыруға шақырды.
Ал, «Сыр медиа» серіктестігінің 60-қа жуық қызметкері вакцина алып үлгерді. Халықтың ортасында жүріп, тұрғындармен тығыз байланыс орнататын тілшілер бірінші кезекте сақтануы керек
– Ұжымда алғашқылардың бірі болып «Спутник-V» вакцинасын салдырдым. Денсаулық – әр адамның баға жетпес байлығы, сондықтан дерттің алдын алу маңызды. Пандемия басталғалы індетті тоқтататын вакцинаның болмауынан қаншама адам зардап шекті. Өткен ғасырлардағы нәубетті кезеңдерде адамзат баласы вакцина арқылы ғана індеттің бетін қайтарған. Сондықтан өзіңді де, өзгені де қорғаудағы басты қадам вакцина екенін ескеріп, екпе салдыруға шешім қабылдадым. Айтарлықтай кері әсері байқалмады, өзімді жақсы сезініп тұрмын, – деді әріптесіміз Ержан Қожас.
Қазір вакцина алғандарға медициналық бақылау талапқа сәйкес ұйымдастырылып, жүйелі жүргізілуде.
Айта кету керек, медицина орталықтарынан бөлек, жылжымалы бригадалар шалғай ауыл-аймақтарды аралап екпелеу жұмысын жүргізуде. «Қорқыт ата», «Aray City MALL» сауда орталығында жылжымалы егу бригадасы келушілерге тегін медициналық қызмет көрсетуде.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<