Қызылордада самбодан жасөспірімдер арасында Қазақстан Республикасының чемпионаты өтуде. Тәуелсіздіктің 30 жылдығына арналған спорттық шараның ашылу салтанатына облыс әкімінің орынбасары Серік Ахмет қатысты.
Самбо – Ресейде өткен ғасырдың 20-шы жылдарында, біздің елімізде 1950 жылы өркендей бастаған спорт.
– Айтулы спорт түрі облыста 1986 жылдан бері қарқынды дамып келеді. өңірде самбоның дамуына Қазақстан Республикасының еңбек сіңірген жаттықтырушылары Әділбек Серікбаев пен Ишанбек Жұмабаев зор үлес қосты. Олардың талантты шәкірттері, халықаралық дәрежедегі спорт шеберлері Жамал Бозова, Нұргүл Тағаева, Алмат Қодаров, Мейіржан Қуанбаев, Қайрат Жалғасбаев, Дархан Сержанов әлем ареналарында ел намысын абыроймен қорғады. Қазір Қазақстан Республикасының Тұңғыш Президенті – Елбасы Нұрсұлтан Назарбаев пен Президент Қасым-Жомарт Тоқаев спорт саласының дамуына барлық жағдай жасауда. Облыстағы 9 балалар мен жасөспірімдер спорт мектебінде самбомен 987 спортшы шұғылданады, – деді Серік Әбжәліұлы.
Сондай-ақ, байрақты бәсекеде облыстық Жауынгерлік өнер қауымдастығының президенті Мақсұт Баймағамбетов спортшыларға сәттілік тіледі.
Жарыста Нұр-Сұлтан, Алматы, Шымкент қалалары және барлық облыстан 2003-2004 жылдары туған 500-ге жуық самбошы 18 салмақ дәрежесінде шеберлік байқасуда. Чемпионат нәтижесінде маусым айында Өзбекстанда өтетін Азия, қазан айында Моңғолияда жалауын көтеретін Әлем чемпионаттарына қатысатын Қазақстан құрамасы жасақталады. Жарыстың бас төрешісі – халықаралық дәрежедегі төреші, атыраулық Ербол Төлеген.
Айта кету керек, спорттық шараны ҚР Спорт және дене шынықтыру істері комитеті, облыстық дене шынықтыру және спорт басқармасы, облыстық самбо федерациясы ұйымдастыруда. Алғашқы күні алты салмақ бойынша жеңімпаздар анықталды. Жарыс 19 наурызда аяқталады.
Айдана ЖҰМАДИНОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
