Кеше облыс әкімі Гүлшара Әбдіқалықова «Болашақ» университетіндегі жаңа спорт кешенінің ашылу рәсіміне қатысып, оқу орнындағы жатақхана, жылыжай жұмыстарымен танысты.
Шараға «Болашақ» университетінің ғылыми жетекшісі, профессор, ұлттық ғылымдар академиясының академигі Бақберген Досманбетов, қала әкімі Ғанибек Қазантаев қатысып, университет кампусын аралады.
Жабық спорт кешенінің жалпы аумағы – 2260 шаршы метр. Ғимарат құрылысы өткен жылы жеке инвестиция есебінен салынған. Нысан ішінде шағын футбол, баскетбол, волейбол, гимнастика, бокс, күрес, ауыр атлетика, үстел теннис залы және бассейн қаралған.
Сондай-ақ, университеттегі жаңа жатақхананың лентасы қиылды.
Аймақ басшысы 444 орындық Назарбаев университеті үлгісінде салынған жатақхананы аралап, студенттерімен дидарласты. Мұнда «Мемлекеттік және жергілікті басқару» мамандығының ІІ курс студенті Камал Мейірхан вакцина салдырып, ұтыс нәтижесімен жатақхана төлеміне 50% жеңілдік алғанын жеткізді.
Мұнан кейін аймақ басшысы жаңа корпустың алдында салынып жатқан екінші жатақхананың құрылысын көрді. Жатақхана құрылысы 2022 жылдың қаңтар айында аяқталады.
Облыс әкімі университет ауласындағы конгресс-холдың құрылыс жұмыстарымен де танысты. Алдағы уақытта мұнда дүкен, дәріхана, пошта бөлімшесі секілді студенттердің күнделікті өміріне қажетті нысандар салынбақ. Сондай-ақ, Гүлшара Әбдіқалықова университет жылыжайының жұмысымен танысты. Аумағы 2000 шаршы метрді құрайтын жылыжай сегіз бөліктен тұрады. Мұнда қияр, қызанақ, құлпынай, лимон секілді жеміс-жидек пен көкөністің бірнеше түрі өсіріліп, университет асханасында қолданылады. Облыс әкімі университет ұжымына сәттілік тіледі.
Айта кетейік, университет аумағында 1 оқу корпусы, 400 орындық жатақхана, конгресс-холл, студенттерге қызмет көрсету орталығы, кинотеатр, көрме залы, ашық спорт кешені, сауда ойын-сауық орталығы, тәжірибелік-өндірістік орталық, клиника, балабақша, дендропарк қарастырылған. Университетте 250 педагог 5000-ға жуық студент және магистрантқа білім береді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
