Өткен жылы індеттің белең алған уақытында дәрі-дәрмек тапшылығы туындағаны рас. Алайда, сала мамандары бұл олқылықтың орнын толтыруға күш салып, қала дәріханаларында дәрінің бар-жоғына, бағасына байланысты мониторинг жүргізді.
Нақты шара нәтиже бергені есте. Биыл да осы тектес жұмыстар өз жалғасын табуда. Бұл туралы облыстық медициналық және фармацевтикалық бақылау департаменті басшысының орынбасары Ғалима Әзірова өңірлік коммуникациялар қызметінде өткен брифингте хабарлады.
Ғалима Жақсылыққызының айтуынша, өткен жылдың 2-жартыжылдығына 6478 дәрілік зат атауына шекті баға бекітілген, биыл да 6512 дәрілік препаратқа нақты баға белгіленді.
– Қазір дәрі-дәрмектің 7 мыңнан астам атауы тіркелген және қолдануға рұқсат етілген. Android және Appstore платформаларында «DARI.KZ» мобильді қосымшасы қолжетімді. Оның көмегімен кез келген тұрғын ҚР аумағында тіркелген дәрілік заттардың барлық тізбесін көре алады. Пайдаланушыға медицинада қолданылуы жөніндегі нұсқаулық, қаптама макеттері, қолдану тәсілдері, сертификаттар, дәрілік заттың толық атауы, өндіруші туралы ақпарат, тіркеу куәлігінің нөмірі мен баламалар тізбесі қолжетімді. Сондай-ақ, шекті бөлшек сауда бағасынан асып кету фактілері анықталған кезде шағым беруіне мүмкіндік бар, – деді ол.
Спикер осы кезге дейін бағаны негізсіз өсіру фактілері орын алғанын жасырмады. Мұндай әрекетке жол бергендерге 33 әкімшілік іс бойынша жалпы сомасы 5180970 теңгеге айыппұл салынған. Биыл шекті бөлшек сауда бағаларынан асып кету фактілері тіркелмеген. Сонымен қатар осы жылы «Қызылорда» Өңірлік инвестициялық орталығы» ЖШС арқылы 17 фармацевтикалық ұйым барлығы 281,2 млн теңге сомасында қаржыландырылып отыр.
Оған ыстықты түсіретін антибиотиктер, вирусқа қарсы иммуностимуляторлар, медициналық бұйымдар, инъекциялық және гормондық препараттар сатып алынса, 1,2 млн теңгені құрайтын дәрілік препараттар өңірге енді жеткізілмек.
М.СНАДИН
>>> Біздің Facebook, Instagram парақшаларымыз бен Telegram каналымызға жазылыңыз! <<<