Өңірде «Keremet-et» брендімен танымал жартылай дайын өнімдер сұранысқа ие. Қала тұрғыны Айдос Алменов бұл кәсіпті 2017 жылы бастаған. Бүгінде нарық әлемінде қанаты қатайған кәсіпорын тәулігіне
1 тонна ет өнімін өндіреді. Мұнда 40-тан астам адам жұмыс істейді.
Кәсіпорын аймақтағы 250 сауда орнына тұшпара, фарш, тефтель, фрикаделька, котлет тәрізді жартылай дайын өнімдер өткізіп отыр. Айдос Алменов 2008 жылдан бастап ет сатумен айналысса, араға тоғыз жыл салып кәсібін кеңейтті. Ет өнімдерін өзі өндіруге шешім қабылдап, ол үшін 2019 жылы «Ресей жинақ банкі» арқылы 30 млн теңге несие алды. «Қарапайым заттар экономикасы» бағдарламасы аясындағы мемлекеттің қолдауымен цехты іске қосты.
– Үкімет қазіргі төтенше жағдай кезеңінде шағын және орта бизнеске ерекше мән беріп, қаржыландырудың қолжетімділігін арттыру, бизнесті тексеруді азайту, сондай-ақ, салықтық жеңілдіктер беру мүмкіндіктерін қарастырды. Мемлекеттің бұл қолдау шараларының шапағатын көріп отырған кәсіпкерлердің бірімін. Мұндай жеңілдіктер қазіргі бизнестің тоқырау кезеңінен өтіп, қайта қалыпқа келуіне үлкен мүмкіндік береді. Отандық өндірісті дамыту мақсатындағы «Қарапайым заттар экономикасы» мемлекеттік бағдарламасы бүгінде өңір кәсіпкерлеріне өз тиімділігін көрсетуде, – деді А.Алменов.
Биыл мемлекеттік және өңірлік бағдарламалар аясында жұмыссыздар мен өзін-өзі жұмыспен қамтыған азаматтардың 1,5 мыңға жуық бастамасын гранттармен, шағын және орта бизнестің 500-ден аса жобасын жеңілдетілген несиелермен қамтамасыз ету көзделіп отыр. Бұл өз кезегінде өңірімізде шағын және орта бизнесте жұмыспен қамтылғандардың санын ұлғайтуға, өнім көлемін арттыруға, жалпы өңір экономикасының одан әрі дамуына өзіндік ықпалын тигізбек.
Дәулет ҚЫРДАН,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
