Адами қасиеттердің ең қадірлісі – қайырымдылық. Ал оны жасау үлкенін сыйлаған, қариясын қастерлеген, жетімін жылатпаған қазақ халқына тән қасиет екеніне ешкімнің таласы жоқ.
Кеше «Азаматтық Альянс» қауымдастығы және «Qyzylorda» телеарнасының ұйымдастыруымен тікелей эфирде «Мейірімділік шапағаты» қайырымдылық телемарафоны өтті. Оған облыс әкімі Қуанышбек Ысқақов, Қызылорда қаласының әкімі Нұрлыбек Нәлібаев, басқарма басшылары және “Nur Otan” партиясы облыстық филиалының, этно-мәдени бірлестіктер мен ҮЕҰ мүшелері қатысты.
Шара Алматы маңында ұшақ апатынан орын алған қайғылы оқиғадан қаза тапқандарды 1 минут үнсіздікпен еске алудан басталды. Мұнан соң аймақ басшысы сөз алып, қайырымдылық шарасының маңызына тоқталды.
– Құлағанның қолтығынан демеп, сүрінгенге сүйеніш болу – халқымыздың қанына біткен асыл қасиеттердің бірі. Қамқорлықты қажет ететін жандарға қол ұшын беру арқылы адамзат баласы жақсылыққа қадам бастайды. Адамның бірі – жылы сөзге, бірі – мейірімге мұқтаж болса, енді бірі – өзгелердің көмегіне зәру. Бір ай бойы «Nur Otan» партиясы облыстық филиалы, «Азаматтық Альянс» қауымдастығы «Мейірімділік шапағаты» қайырымдылық шарасының өтуіне ұйытқы болуда. Бұл Сыр азаматтарының ынтымағы мен ауызбірлігін, ақ жүрегі мен дархан көңілін көрсетсе керек, – деді облыс әкімі.
Мейірімділік – ізгіліктің жолы. Риясыз жасалған жақсылық – биік адамгершіліктің белгісі. Бүгінгі шара аясында жомарт жүрек азаматтардың тікелей қолдауымен қала бойынша әлеуметтік жағынан аз қамтылған, асыраушысынан айырылған, қарттар мен ата-ана қамқорлығынсыз қалған балалар, көпбалалы, мүгедек және тұрмысы төмен отбасыларға азық-түлік түрінде көмек көрсетілді. Осы шара барысында облыстың мемлекеттік қызметкерлері мен жекелеген азаматтар өздерінің бір күндік жалақысын аударып, 4 млн теңгеден аса қаржылай көмек берді.
– 2013 жылдан бері көпбалалы және аз қамтылған отбасылардың, әсіресе, ауылдық жерден шыққан талапты балаларды оқытуға облыс әкімінің арнайы грантын тағайындап келеміз, бүгінгі күні мыңнан аса мектеп түлегі грант иегері атанды. Апатты жағдайдағы үйлер мен жатақханаларда тұрып келген отбасыларды жаңадан салған үйлерге қоныстандыру үрдісімізге айналды. Қызылорда облысы әлеуметтік салаға қаржы бөлуден аймақтар арасында көш бастап тұр, – деді облыс басшысы.
Өңірде мұқтаж адамдарға қолдау көрсету шараларын күшейту мақсатында жыл басында көпбалалы және аз қамтылған отбасыларға қосымша қолдау шараларын ұсыну үшін «2019-2021 жылдарға арналған өңірлік әлеуметтік жол картасы» қабылданды. Жол картасы аясында табысты арттыру және халықтың аз қамтылған топтарын қолдау, табысы төмен азаматтардың баспана мәселесін шешу және білім беру мен денсаулық сақтау салаларын жақсарту, сондай-ақ, өңірлерді кешенді дамыту бағытындағы ауқымды іс-шаралар көзделіп, 42 млрд теңге бюджеттен бөлінген. Оның ішінде атаулы әлеуметтік көмектің мөлшері ұлғайтылып, барлығы 31 мыңнан астам отбасыға 20 млрд теңгеге жуық жәрдем көрсетілді.
«Мейірімділік шапағаты» телемарафоны «Qyzylorda» телеарнасында да өтті. Телеарна арқылы көрерменге тікелей эфирде өткен шараға аймақтағы түрлі мекемелер мен кәсіпорын өкілдері қатысып, қолдарынан келген көмегін аянып қалмады.
– Бұл шараға қаншама қатысушы қол ұшын созып жатыр. Бүгін мүмкіндігі шектеулі балаларға көмек көрсетті. Шиелі ауданында да осындай игі іс жасалды. Барлық аудандар қамтылады деген ойдамыз, – дейді облыстық «Азаматтық Альянс» қауымдастығының жетекшісі Сапура Әбдірахимова.
«Сыр мейірімі» әлеуметтік-қоғамдық қоры қолға алған бастама біраз жанға қозғау салды. Көпшілік мұқтаж жандарға азық-түліктей, қаржылай қолдау көрсетуде. Белсенділік танытқан мекемелер қатарында «Абай-Дәулет» серіктестігі, «Best-Сервис ЛТД» ЖШС, «Қазақстан Тұрғын үй құрылысы жинақ банкі» облыстық филиалы бар. Сондай-ақ, «Ұрпақтан ұрпаққа» қоғамдық бірлестігінің төрайымы Алмагүл Божанова, ардагерлер Р.Көзденова, А.Жұмабаев, Ә.Әмірғалиев, Г.Әбубәкірқызы телеарна арқылы тікелей эфирде қайырымдылық турасында сұхбат өрбітті. Мемлекет және қоғам қайраткері Әбдіжәлел Бәкір де шараға қатысып, өз пікірін білдірді.
– Бір-бірімізді қолдайтын, демеу көрсететін жағдайымыз бар. Ал қайырымдылық дегеніңіз қазақтың табиғатында бар ұғым: ол қазақтың жанында бар, жүрегінде бар, дәстүрінде бар. Сондықтан атадан балаға мирас болып қалған осы ұлы дәстүрді жалғап, бірлігімізді көрсететінімізге сенімім кәміл, – деді Ә.Бәкір.
Бүгінде республикада осы бағытта «Ел үлесі – пәтерге» жобасы жүзеге асып келеді. Нәтижесінде жүздеген жан жаңа пәтерге қол жеткізді. Телемарафонға қатысқан «Сұлтан» мешітінің бас имамы Қайырбек Отызбаевтың айтуынша, бұл бастамаға Сыр халқы да белсенді атсалысуда.
– Акция аясында жыл басынан 117 баспана мұқтаж жандарға табысталса, оның ішінде 16 отбасы – қызылордалық. Тек облыс орталығын ғана емес, аудандарды да, елді мекендерді де қамтыдық. Жерлестеріміз игі істерден шет қалып жатқан жоқ әрі азық-түлік табыстаумен шектелмеді. Бізді осы қуантады, – дейді Қ.Отызбаев.
Айта кетейік, мұқтаж жанға мейірім мен шапағат сыйлаған шуақты шара 29 желтоқсанға дейін жалғасатын болады.
Мейрамгүл ДАУЫЛБАЙҚЫЗЫ,
Дәулет Қырдан.
>>> Біздің Facebook, Instagram парақшаларымыз бен Telegram каналымызға жазылыңыз! <<<
