Мектеп бітіретін жылы бізге өз еліміздегі университеттерді және Ресейдің жоғары техникалық оқу орындарын таңдау мүмкіндігі ұсынылды. «Мәскеу болат және қорытпалар институты» Ұлттық зерттеу технологиялық университетіне грант жеңіп алғанда алғашында қобалжығанымыз рас. Қалай дегенмен де басқа елге, үлкен қалаға үйренісіп кетуге уақыт керек. Ата-анамыздан жырақта, өздігімізбен өмір сүруге бейімделу де оңай соқпайтын сияқты көрінді.
Мәскеуге табан тірегенімізде қорқынышымыз бірден сейілді. Өйткені жан-жақты қолдауды сезіндік. Облыс әкімі Қырымбек Көшербаевпен әр кездесуден қанаттанып шығатынбыз. Бізге сенім арта отырып, алға жетеледі. «Айналайындар, алған білімдерің туған жерлеріңді түлетуге, жаңа идеяларды, инновациялық жобаларды жүзеге асыруға жараса, барлығымыздың үмітіміздің ақталғаны, еңбегіміздің қайтқаны» деген сөзі иығымыздағы жауапкершілік жүгінің салмағын ұғындырды.
Өзімізге берілген мүмкіндікті пайдаланып, білім алу, тіл үйрену, ата-аналарымыздың, облыс басшылығының үмітін ақтауымыз керектігін түсіндік. Бір жылды артқа тастаған соң, кейінгілерге түйгенімізді айтып, жол көрсететін болдық. Мәскеуге келген іні-қарындастарымыздың қалаға үйренісуіне, кейбірінің тілдік барьерден өтуіне, жатақхана өміріне бейімделуіне көмек көрсеттік.
Мен университеттің «Металловедение и физика прочности» кафедрасынан «Инженер-металлтанушы» мамандығын алдым. Соңғы курста бітіруші түлектерге жұмыспен қоса әрі қарай білім алуды жалғастыруға болатыны айтылды. Ұзақ ойланып, ата-анаммен ақылдасып «Электроэнергетика және электротехника» мамандығына магистратураға түсуге шешім қабылдадым. Білімімді ұштау, игергенімді шыңдау үшін бұл мүмкіндікті де құр жібермеу керек деп ойлаймын.
Асқар ТІЛЕУЖАН,
«Мәскеу болат және қорытпалар институты» Ұлттық технологиялық зерттеу университетінің түлегі.
>>> Біздің Facebook, Instagram парақшаларымыз бен Telegram каналымызға жазылыңыз! <<<
