Депутат балалардың жазғы демалыс орындарын сынға алды

554

0

Фото: Алматы облысы әкімдігі

Мәжіліс депутаты Елнұр Бейсенбаев еліміздегі балалардың жазғы демалысын сапалы ұйымдастыруға қатысты ұсыныс айтты.

«Балалардың жазғы демалысын ұйымдастыруда олқылықтар бар. Мәселен, былтыр Алматы облысының Ұзынағаш ауылында балалар лагерін саунада ұйымдастырған. Ол қоғамда үлкен шу туғызды. Осы мәселе бойынша сот жуырда ғана аяқталды. Кінәлілер сотталып, бас бостандықтарынан айрылды. Сот 2023 жылы кәсіпкер әйелдің 50 баланы балалар лагері деп өз жеке мектебіне, 300 баланы фитнес-орталығы бар монша кешеніне орналастырғанын анықтады. Басқа басқа, балаға қатысты мұндай теріс қадамға бару – нағыз бассыздық, ақша үшін ардан аттау емес пе?! Тағы бір мысал. Бас прокуратура 2023 жылы тамызда Алматы облысында уәкілетті органның рұқсатынсыз жұмыс істеген 8 балалар лагерін анықтаған. Олардағы жағдай да ешбір сын көтермейді. Санитариялық-эпидемиологиялық және өрт қауіпсіздігі нормалары мүлдем сақталмаған. Спорт және ойын алаңдары да қауіпсіздік талаптарына сай емес. Былтыр Қонаев қаласындағы «Бәйтерек» лагерінде шартта көрсетілгеніне қарамастан, балалардың тиісті демалысы мен оқуы ұйымдастырылмаған», – деді Е.Бейсенбаев Үкімет басшысының орынбасары Тамара Дүйсенованың атына жолдаған сауалында.

Оның айтуынша, сол секілді Шымкенттегі «Hawaii» лагері өртке қарсы дабыл жүйесімен жабдықталмаған және міндеттелген санитарлық-эпидемиологиялық қорытындысыз жұмыс істеген. Сондай-ақ, 220 балаға арналған «Үш бұлақ» лагері іс жүзінде 310 оқушы қабылдаған.

«Айта берсек, мұндай мысалдар жетерлік. Балалар мұндай жазғы демалыс орындарында алаңсыз тынығып, жаңа оқу жылына тың күшпен келудің орнына, түрлі келеңсіздікке ұшырап жатқаны өкінішті. Тиісті заң енді мұндай орындарды ескертусіз тексеріп, талапты сақтамағандарға нақты шара қолдануға мүмкіндік береді. Сондықтан осындай олқылықтардың барлығын жойып, балалардың биылғы жазғы демалысын сапалы ұйымдастыруға жете мән берген жөн. Бұл ретте, елімізде балалар лагері мүлдем жетіспейді. Олар бар болғаны балалардың 10 пайызын ғана қамтиды. Оның ішінде сапалы демалысты қамтамасыз ете алатыны санаулы ғана. Пандемиядан кейін лагерлердің 30 пайызы нарықтан кетті. Ашығын айту керек, балалардың жазғы демалыспен қамтылуы туралы статистика көкөйге қонбайды. Өйткені, жергілікті әкімдіктер мектеп жанындағы лагерьлерді жазғы лагерь деп есептейді. Атап айтқанда, мектеп жанындағы лагерьлер – жазғы демалыс емес. Ол тек қана 5-6 сағат уақыт өткізуге арналған», – деді депутат.

Бұл тұрғыда ол тез арада тиісті жұмыстарды атқаруды ұсынды.

«Біріншіден, су тасқынынан зардап шеккен өңірлердің балаларына жазғы сауықтыру орталықтарынан орын бөлуді қарастырғаны жөн. Екіншіден, мемлекеттік сатып алу бойынша конкурс өткізу кезінде ерекшеліктері бар балаларға инклюзивтік білім беру талаптарын орындау көзделуі тиіс», – деді Елнұр Бейсенбаев.

 


>>> Біздің Facebook, Instagram парақшаларымыз бен Telegram каналымызға жазылыңыз! <<<