Су шаруашылығы қызметкерлерінің атаулы мерекесінде халықты уақыт өткен сайын адамзаттың аса зәру мұқтаждығына айналып келе жатқан тіршілік нәрімен қамтамасыз етіп жүрген сала қызметкерлері еңбектеріне лайық марапат иеленді. Солардың қатарында «Елеулі еңбегі үшін» төсбелгісін алған «Арал-Сарбұлақ» топтық су құбыры кәсіпорнының Аралқұм насос станциясындағы аға шебері Темірхан Ахметов те бар.
Темірхан Рамбердіұлы еңбекке тым ерте араласты. Оның негізгі себебі, Қарақұмда өмір бойы қой баққан «Еңбек Қызыл Ту» орденді әкесі Рамберді Ахметұлы мен анасы Бәтиманың «баланы жастан» деген темір тәртіпке негізделген тәрбиесі болатын. Еңбекқор ата-ананың бүгінде үйлі-баранды болып, өздері ата-әжеге айналған үш ұл, екі қызы еңбекпен шынықты. Сабақтан бос уақытта жылдың төрт мезгілінде жайлаудан қыстауға, қыстаудан жайлауға көшкенде, қой төлдетуде, қырқым, қаракөл дайындау пунктінде төлді іріктеу, сою, терісін кептіру, қырып тазалау, сорттауда, өздері дайындаған қаракөл терісін Шымкентке апарып өткізіп келу сапарында әкесіне жәрдемші болды. Бұл болашақтың нәтижелі өзегіне айналып, жемісін берді.
Темірхан Аралқұмдағы орта мектепті бітіріп Қарақұм кеңшарында бір жылдай жұмыс істеген соң, Ресейдің Иркутск қаласында әскери борышын өтеп қайтты. Қызылордадағы политехникумнан инженер-құрылысшы мамандығын алып шықты. Қарақұм кеңшарында жұмысшы, аға жұмысшы, шебер болып еңбек етті де, Аралқұмға қоныс аударды. 2003 жылдан «Арал-Сарбұлақ» топтық су құбыры мекемесіне жұмысқа орналасты.
– Бала күнімнен еңбекке ерте араласқан мені жаңа ортам жатырқаған жоқ, – дейді ол су шаруашылығы саласындағы еңбек жолы туралы сөз ете отырып, – содан бергі жылдар аралығында қатардағы жұмысшы, машинист, аға машинист, шебер, аға шебер қызметтерін меңгердім. Мұны маңдай тердің қайтарымы ретінде мақтан тұтамын. Қызметімнің сұранысына сәйкес 2006 жылы Қорқыт ата университетінен инженер-құрылысшы мамандығын бітіріп шықтым. Қазіргі кезде жүздеген шақырымды қамтитын «Арал-Сарбұлақ» су құбырын пайдалану басқармасына қарайтын мемлекеттік коммуналдық кәсіпорнының «Бердікөл» және «Қосаман» су құбырының екі су тартқысындағы 12 су көтергіш сорап станциясының, хлорлау қондырғыларының, 38 ұңғыманың Арал және Қазалы халқын сумен қамтамасыз етіп отырғанын ел біледі. Басты мақсатымыз – халықты тәулік бойы сапалы ауызсумен қамтамасыз ету. Осы салада мен Аралқұм елді мекенінің насос станциясына жауаптымын. Бір бағыты Қазалыға қарай, мына жағы Қамыстыбас, Аманөткел, Бөген, Қаратерең, Жаңақұрылыс, қадағалап жүремін. Мерекемізге орай еңбегімді елеп жатқан басшыларыма да алғысым шексіз.
Жолын тосып отыратын үй шаруасындағы жолдасы Жаңыл Ахметова, Аралқұм елді мекені әкімшілігінде статист болып еңбек ететін ұлы Қуаныш пен медбике болып қызмет жасайтын келіні Зәуреш, төрт немересі – Темірханның бар байлығы.
Арал ауданы әкімінің «Су шаруашылығының үздігі» дипломы, Экология және табиғи ресурстар министрінің Құрмет грамотасы, «Нұра» топтық су құбыры кәсіпорнының Құрмет грамотасы, кәсіби мерекеге орай берілген «Елеулі еңбегі үшін» төсбелгісі Темірханның еңбегінің еленгенін айғақтайды.
Әлімжан ҚИЯС.
Қазалы ауданы
