Қызылордадағы «Қайсар Арена» стадионында Қазақстан Премьер-лигасының 12-туры аясында жергілікті «Қайсар» мен семейлік «Елімай» командасы өзара кездесті. Тартысқа толы өткен матчта қонақтар 3:2 есебімен жеңіске жетті.
Кездесу басталысымен-ақ семейлік футболшылар өздерінің фаворит екендігін байқатып, шабуылға ден қойды. Нәтижесінде ойынның төртінші минутында Роман Мұртазаев қорғаныс қателігін тиімді пайдаланып, есеп ашты.
Алайда қызылордалықтар тез арада ес жия білді. Матчтың 11-минутында алаң иелерінің шабуылы сәтті аяқталып, Никола Цуцкич баспен гол соғып, таразы басын теңестірді. Осыдан кейін ойын біраз уақыт тең дәрежеде өрбіді.
Екінші таймда қонақтар тағы да шабуыл қарқынын күшейтті. Матчтың шешуші сәттерінің бірінде «Елімайдың» шабуылшысы Меме Плакка Фессу жылдамдығын тиімді пайдаланып, қарсылас қорғаушыларынан сытылып кетіп, командасын қайтадан алға шығарды. Көп ұзамай семейліктер пенальтиден де мергендік танытты. Айбар Жақсылықов 11 метрлік айып добын дәл орындап, есеп айырмасын екі голға жеткізді.
Қызылордалықтар матч соңына дейін күрескенімен, тек қосымша уақыттың 94-минутында ғана қарымта қайтара алды. Нигериялық шабуылшы Имо Эзекиль қарсылас қақпасынан саңылау тауып, есепті қысқартты. Қалған уақытта алаң иелеріне таразы басын теңестіруге мүмкіндік жетпеді. Осылайша, тартысты өткен кездесуде «Қайсар» өз алаңында «Елімайға» 2:3 есебімен жол берді.
Матчты тамашалауға облыс әкімі Мұрат Ергешбаев арнайы келіп, жергілікті командаға қолдау білдірді.
12-тур қорытындысы бойынша «Қайсар» Қазақстан Премьер-лигасының турнирлік кестесінде 10 ұпаймен 12-орында қалып отыр. Алда қызылордалық ұжым 14 маусым күні ақтаулық «Каспиймен» ойнайды. Кездесу «Қайсар Аренада» өтеді. Сыр жанкүйерлері бұл матчта командадан жеңісті ойын күтіп, турнирлік жағдайын жақсартатын маңызды үш ұпайға сенім артып отыр.
Бағлан АМАНЖОЛ,
«Сыр бойы»
