Майдангер Әлжан Жалғасбаев әкесі Көшен репрессияға ұшырап, мал-мүлкі кәмпескеленген соң, Қазалыдағы балалар үйінде тәрбиеленіп, 7 сыныптық білім алған. Арнайы жолдамамен Жамбылдағы педагогикалық училищеге түсіп, 1938 жылы орта арнаулы оқу орнын бітірген. Сол жылы осы облыстың Свердлов ауданындағы орта мектепте мұғалім болды. Қызметпен қатар Шымкент қаласындағы екі жылдық мұғалімдер институтын сырттай бітірген. Жамбыл қаласындағы Микоян атындағы орта мектепте еңбек етіп жүріп, Кеңес армиясы қатарына алынған.
Ол жастайынан басқа түскен қиындыққа мойымай, қайта шыңдала түсті. Өмірдің ащысы мен тұщысын әбден татты. Жігерін жанитын қиындықтар өмір жолында көп кездесті. Жақсы адамдарға қарап бой түзеді, өз-өзін тәрбиеледі, білім алуға ұмтылды. Әлжан Жалғасбаевтың тұлғалық қасиеті осылай қалыптасты.
Өзбекстанның Бұқара қаласындағы Подольск артиллериялық училищесінде 1941-1942 жылдары оқыған соң, 1943 жылдың наурызынан танкке қарсы жауынгерлік полктің 1514 артиллериялық взводы командирі болған. Сол жылдың мамыр айынан бірінші танк корпусы 44-мотоатқыштар бригадасы артиллериялық батареясының командирі қызметін атқарған.
1945 жылдың қазан айынан бастап армия қатарынан демобилизацияланғанға дейін аталған бригаданың жеке артиллериялық дивизионы командирінің орынбасары болып, Беларусь, Балтық майдандарында ерлік көрсеткен.
Бейбіт өмірдегі жұмысы Қызылорда атқару комитетіне қарасты мәдени-ағарту мекемесі облыстық бөлімінің меңгерушілігінен басталды. Қазақстан компартиясы орталық комитетіне қарасты екі жылдық партия мектебінде оқыды. Саяси және ғылыми білімін тарату қоғамының жауапты хатшысы болып, Қызылорда педагогикалық институтында білім алды. Оқумен қатар кеңес баспасының қалалық бөлімінде жұмыс істеді.
Жары, жоғары білімді мұғалім Қалантай Тәжібаевамен Бақытгүл, Сәуле, Бақытжан, Ғалымжан, Сәлімжан, Болатбек есімді перзенттер тәрбиеледі.
Майдангердің дүниетанымында адамгершiлiк, ерлік, Отанға деген махаббат басты орында еді. Өмiрге парасатты көзқарасы, елiне сүйiспеншiлiгi, адамдықты құрметтей бiлуі жанында жүрген, көзкөрген азаматтардың естеліктерінен аңғарылып тұр. Дүниеден озғанша халықпен бiте қайнасып өмір сүрді. Білім мен ғылым жетiспеген ортаны көрсе, олардың ертеңiн ойлап, мұңға бататын. Соғыстан кейінгі өмірін ұстаздыққа арнауы да сондықтан.
Табиғатынан зерек әрі батыл жан тыңдаушыларын таңғалдырып, ерлікті, елдікті дәріптеуден жалықпайтын. Керек жерінде кімнің де болса бет-жүзіне қарамай, ойын бүкпей, батыл айтып, адам бойындағы жасық қасиеттерді сынға алатын.
Соғыс және еңбек ардагерінің пайымдауынша, тіршілікте көрген қызығың мен қуанышың өткінші жаңбырдай қысқа, бұлдыр сағымдай тұрақсыз, сондықтан адам ойындағы барлық асылын, бойындағы қуатын жақсылыққа жұмсауға тиіс. Өмірді босқа өткізіп, қапы қалмау үшін әрбір кісі ақыл-парасаты мен күш-қайратын пайдалы іске жұмсап, мәнді өмір сүруге міндетті. Өзі де дәл солай өмір сүрді. Адал еңбегінің арқасында халықтың ризашылығына ие болды, еңбегі елеулі болып, жоғары бағаланды.
Ол 7 орден (3 «Қызыл Жұлдыз» , 3 «Ұлы Отан соғысы», «Александр Невский» ордендері), 8 медальмен және Қазақ КСР Жоғарғы Кеңес Президиумының мақтау қағазымен марапатталған. Қызылорда қаласындағы №11 орта мектепте Ә.Жалғасбаев сабақ берген дәрісхана музейге айналып, алғашқы әскери даярлық пәніне қатысты және батырдың ерлігін баяндайтын кішігірім экспозиция құрылды. Сонымен қатар Тасбөгет кентінің бір көшесіне Әлжан Жалғасбаевтың есімі берілді.
Батыр денелі, озық ойлы Әлжан Көшенұлын жұртшылық жақсы танитын, жандарына жақын тартатын. Мектепте ұйымдастырылған музей, Тасбөгеттегі оның атына берілген көше ерлік даңқының ешқашан өшпейтінін айғақтап тұрғандай.
Ғалымжан ЖАЛҒАСБАЕВ
>>> Біздің Facebook, Instagram парақшаларымыз бен Telegram каналымызға жазылыңыз! <<<
