Суға шомылу маусымында тұрғындардың қауіпсіздігін қамтамасыз ету үшін кешенді жұмыстар жүргізілуде. Су айдындарындағы жазатайым оқиғалардың алдын алу, қауіпсіздік мәдениетін қалыптастыру және балалардың өмірі мен денсаулығын қорғау бағытында рейдтік, профилактикалық және ақпараттық-түсіндіру шаралары тұрақты түрде ұйымдастырылуда. Бұл туралы Өңірлік коммуникациялар қызметінде өткен баспасөз конференциясында облыстық Төтенше жағдайлар департаментінің Төтенше жағдайларды жою басқармасының бастығы Жандос Досымов мәлімдеді.
Оның айтуынша, өңірдегі су айдындарында азаматтардың қауіпсіздігін қамтамасыз ету мәселесі ерекше бақылауда. Әсіресе жаз мезгілінде тұрғындардың өзен-көлдерге жиі баруына байланысты қауіпсіздік талаптарын сақтау аса маңызды.
– Су айдындарындағы қауіпсіздік мәдениетін қалыптастыру – басты міндеттеріміздің бірі. Осы орайда департамент қызметкерлері полиция, жергілікті атқарушы органдар, еріктілер, үкіметтік емес ұйымдар, блогерлер және бұқаралық ақпарат құралдарының өкілдерімен бірлесіп жыл бойы профилактикалық және рейдтік жұмыстар жүргізуде. Жыл басынан бері облыс аумағында 410 рейд ұйымдастырылып, 14 мыңнан астам тұрғынға судағы қауіпсіздік ережелері түсіндірілді. Оның ішінде 7 мыңнан астамы – жасөспірімдер. Профилактикалық жұмыстарға 210 ерікті тартылды. Сонымен қатар, суға түсуге тыйым салынған 63 қауіпті аумаққа 398 ескерту тақтайшасы орнатылды. Білім беру ұйымдарында 38 мыңнан астам оқушыны қамтыған 238 интерактивті және ашық сабақ өткізіліп, судағы қауіпсіздік қағидалары мен төтенше жағдай кезіндегі іс-қимыл тәртібі түсіндірілді, – деді Жандос Ерланұлы.
Судағы қауіпсіздікті қамтамасыз ету жұмыстары шомылу маусымы аяқталғанға дейін жалғасады. Құтқарушылар тұрғындарды тек рұқсат етілген орындарда шомылуға және қауіпсіздік талаптарын қатаң сақтауға шақырады.
«СБ» ақпарат
