Меритократия – мансап жолындағы тиімді қадам. Тәуелсіздіктің 30 жылдығы және 23 маусым – Мемлекеттік қызметші күні қарсаңында облыс әкімі Гүлшара Әбдіқалықова түрлі этнос жастарымен кездесті. Сан салада еңбек етіп жүрген оларды аймақ басшысы мансап биігіне маңдай термен сатылап көтерілуге шақырды.
Кездесуде модератор, мемлекеттік қызмет істері агенттігі облыстық департаментінің басшысы Рафхат Бисенов Қазақстан халқы ассамблеясының Қазақстанды бейбітшілік пен татулық орныққан ел ретінде бүкіл әлемге танытудағы орнын атап өтті.
– Қазіргі таңда қазақ жерінде қалыптасқан достық пен келісім арқасында 100-ден астам этнос пен 18 конфессия бейбіт өмір сүріп жатыр. Саяси тұрақтылықты, қоғамдық келісімді іске асыруда Қазақстан халқы ассамблеясы жетекші роль атқарады, – деді департамент басшысы.
Бүгінде Сыр өңірінде 3,5 мыңға жуық мемлекеттік қызметші бар. Оның тең жартысы – әйелдер. 91 проценті жоғары білімді болса, 500-ге жуығы – жасы 29-ға толмаған қыз-жігіттер. Президент жанындағы мемлекеттік басқару академиясының 22 және «Болашақ» бағдарламасының 4 түлегі түрлі салада қызмет атқарып жүр.
Мемлекет басшысы Қасым-Жомарт Тоқаевтың тапсырмасы аясында сайдың тасындай іріктелген қазақстандық 300 жастан Президенттік кадр резерві жасақталды. Бұл мемлекеттік қызмет саласын жаңартуға, озық ойлы жас көшбасшыларды жұмылдыруға және жастарды ынталандыруға мүмкіндік береді. Үздіктер арасында өңірде белсенділігімен көзге түсіп жүрген, өмір мектебінен өткен өзге этнос өкілдері де бар.
– Мемлекеттік қызмет барысында өз ісіне жауапкершілікпен қарайтын, білімді және еңбекқор жастарды кездестіріп жүремін, солар үшін қуанамын. Жас мемлекеттік қызметші тек білімді ғана емес, жоғары моральдық жауапкершілік пен өз ісіне деген әділдік, адалдық, адамгершілік қасиеттерін тең ұстауы тиіс, – деді облыс әкімі.
Мерекелік кездесуде облыстық цифрлық технологиялар басқармасының басшысы Юлия Тремасова, неміс этномәдени бірлестігінің белсендісі, ІІ дәрежелі «Достық» орденінің иегері Светлана Крюгер, «Zoom» желісі арқылы байланысқа қосылған Парламент Мәжілісінің депутаты Геннадий Шиповских, Қазақстан-Британ техникалық университетінің студенті Евгений Димеденко мемлекет тарапынан жастарға қолдау барын, мемлекеттік қызметтің асқан жауаптылықты талап ететінін тілге тиек етті.
– 16 жасымда цифрлық технология көмегімен «Boeing-757» ұшағының базасы негізінде техникалық, жобалық ұшақтардың апгрейді бойынша жоба жасадым. Оны «Boeing» компаниясы сатып алды. Қазақстандық жастардың білім-ғылымдағы жетістіктері – еліміздегі бірлік пен берекенің нәтижесі, – деді Е.Демиденко.
Қорқыт ата атындағы Қызылорда университетінің студенті, Қазақстан халқы Ассамблеясы жанындағы «Абай қазынасына саяхат» клубының жетекшісі Елена Пак хакім шығармалары алға жылжуға ынталандыратынын айтты.
Мемлекеттік қызмет – мерейлі міндет, сонымен қатар талапты жастар үшін таптырмас мүмкіндік. Аймақ басшысы осы орайда жастарға артылар сенім жүгі салмақты екенін жеткізді.
Назерке САНИЯЗОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
