Талдау жүргізуді тапсырды

268

0

Кеше Премьер-Министр Әлихан Смайыловтың төрағалығымен өткен Үкімет жиынында «Дені сау ұлт» әрбір азамат үшін сапалы және қолжетімді денсаулық сақтау» ұлттық жобасының іске асу барысы қаралды. Отырысқа министрлер, онлайн режимде барлық өңір әкімдері қатысты.

Денсаулық сақтау министрі Ажар Ғиният қан айналым жүйесі ауруларынан болатын өлім-жітім 21,4%-ға, қатерлі ісіктерден 8,7%-ға, тыныс алу ағзаларының ауруларынан 23%-ға және туберкулезден 12%-ға төмендегенін айтты.

Жиын қорытындысымен Үкімет басшысы ана мен бала өлімінің көрсеткіштерін төмендету үшін шұғыл шаралар қабылдау қажеттігін және әйелдер мен жаңа туған нәрестелердің денсаулығына тұрақты мониторинг жүргізуді тапсырды.

Үкімет тапсырмалары негізінде аймақтағы ахуалды саралаған облыс әкімі Нұрлыбек Нәлібаев ана мен бала денсаулығына ерекше мән беруді, кейінгі жылдары бұл көрсеткіш көңіл көншітпейтінін алға тартты. Облыстық денсаулық сақтау басқармасының басшысы Сәбит Пазыловқа өңірдегі емдеу нысандарына талдау жасап, жағдайды жақсарту үшін нақты ұсыныс енгізуді тапсырды.

Облыс әкімі жуырда ғана болған ана өліміне қатысты оқиғаны жан-жақты зерделеп, тексеру жұмыстарына жеткілікті мән беріп, кінәлілерге қатысты тиісті шара көруді міндеттеді. Сондай-ақ, мұндай оқиғаларды болдырмау үшін барлық мүмкіндіктерді пайдалана отырып, нақты шаралар қабылданатынын қаперге салды.

– Әрбір тіркелген өлім – бір отбасының трагедиясы. Өкінішке қарай, ана мен бала өлімінің көрсеткіші кейінгі үш жылдан бері жоғары деңгейде. 2020 жылы 12, былтыр 10, жыл басынан бері 5 ана өлімі тіркелді. Бұл өзекті мәселені осы кезге дейін арнайы қарап, тиісті сала басшысына, дәрігерлерге нақты тапсырмалар берілген еді, алайда орындалуы өте төмен. Нәрестелердің шетінеуі де – күрделі мәселе. бауыр еті – баласынан айырылу оңай емес, бұл – тұтас отбасының тағдыры.

Әр пациент дәрігерге үмітпен келеді, дертіне шипа табамын деп сенеді. Ал, тиісті дәрігерлерде жауапкершілік жоқ. Мұны бей-жай қалдыруға болмайды. Сондықтан ана өліміне жол берген мамандардың мәселесін қарап, талдау жүргізіңіздер, – деді облыс әкімі.

Жиында облыстық перинаталдық орталықтың бас дәрігері Олег Ким мен жұқпалы аурулар ауруханасының бас дәрігері Айна Мұхамбетоваға нақты тапсырмалар берілді.

Ана мен бала өліміне қатысты барлық деректер арнайы комиссия жұмысында сараланып, мамандардың кәсіби жұмысына талдау жүргізіледі. Сондай-ақ, облыстық мәслихат сессиясының күн тәртібінде көтеріледі. Мұнан кейін бұл мәселелер әкімдіктің алдағы кеңейтілген жиынында қаралады.

Отырыс соңында облыс әкімі Ұлттық жобада көзделген көрсеткіштер мен нысаналы индикаторларға қол жеткізуді, дәрігер мамандарының тапшылығын азайту үшін медициналық ұйымдарға талдау жасауды, жүкті әйелдерді босануға дейінгі жеке және салааралық бақылауды сапалы жүргізуді тапсырды.

Облыс әкімінің баспасөз қызметі