Қоғамдағы тәртіп пен қауіпсіздік – ел дамуының басты кепілі. Кейінгі жылдары құқықбұзушылықтардың алдын алу бағытында қолға алынған маңызды бастамалардың бірі – «Ішімдіксіз ауыл» жобасы. Бұл тұрғындардың салауатты өмір салтын ұстануына ықпал етіп қана қоймай, қоғамдық тәртіптің нығаюына, қылмыстың төмендеуіне және ауылдағы береке-бірліктің артуына жол ашуда.
Сыр өңірінде құқықбұзушылықтардың алдын алу, тұрғындардың қауіпсіз өмір сүруін қамтамасыз ету және мемлекеттік органдарға деген сенімді арттыру мақсатында «Заң мен Тәртіп» қағидаты аясында «Ішімдіксіз ауыл» жедел-профилактикалық іс-шарасы жүзеге асырылуда.
Арал ауданындағы он ауыл «Ішімдіксіз ауыл» атанды. Солардың қатарында Үкілісай да бар. Бұл – ауыл тұрғындарының қоғамдық тәртіпті сақтауға, жастарды теріс әдеттерден қорғауға және салауатты өмір салтын қалыптастыруға деген ортақ ұмтылысының айқын көрінісі.
Бастама аясында Арал аудандық полиция бөлімі бастығының міндетін атқарушы, полиция майоры Бектөре Құдайберген мен аудан прокуроры Рамазан Жанаев Үкілісай ауылының тұрғындарымен кездесті. Басқосуда құқықбұзушылықтардың алдын алу мәселелері кеңінен талқыланып, қылмыстың қоғамға тигізетін кері әсері мен оның алдын алу жолдары жан-жақты түсіндірілді. Кездесуде ауыл тұрғындары да белсенділік танытып, пікірлерін ортаға салды. Әр буын өкілдері бұл бастаманы толық қолдайтындарын жеткізіп, қоғамдық тәртіпті сақтауға атсалысуға дайын екендерін білдірді.
Шын мәнінде, ішімдіктен бас тарту – тек бір ауылдың таңдауы емес, болашақ ұрпақтың амандығы үшін жасалған маңызды қадам. Өйткені тәртіп орнаған жерде тыныштық, ал тыныштық бар жерде тұрақты даму мен берекелі өмір болады. Сондықтан «Ішімдіксіз ауыл» бастамасы қоғамдағы қауіпсіздік пен жауапкершілік мәдениетін қалыптастыруға бағытталған игі бастама ретінде жалғасын таба бермек.
«СБ» ақпарат
