Қарымды қаламгер, Қазақстан Жазушылар және Журналистер одағының мүшесі, Сыр елінің тумасы, қазақ әдебиетінің ерек жанры – сатираның сардары Нұрмахан Елтайдың «Әр кәллада бір қиял» атты жаңа кітабы оқырманға жол тартты. Облыс әкімдігінің қолдауымен, Ә.Тәжібаев атындағы облыстық әмбебап-ғылыми кітапханасында өткен жаңа туындының тұсаукесер рәсіміне аймақтың зиялы қауым өкілдері, ақын-жазушылар, БАҚ өкілдері қатысты.
Қалам иесі «Сөз сойыл» сатира жанры бойынша берілетін Балғабек Қыдырбекұлы атындағы арнайы сыйлықтың, облыс әкімінің шығармашылық өкілдеріне арналған «Тұран» сыйлығының, «Ерен еңбегі үшін» медалінің иегері, ауданының құрметті азаматы.
Әдеби кеште сөз алған облыстық қоғамдық даму басқармасы басшысының орынбасары Артур Қамбаров қарымды қаламгерге облыс әкімінің құттықтауын табыс етті. Ақын, Халықаралық «Алаш» әдеби сыйлығының иегері Қатира Жәленова қаламгердің шығармашылығы туралы ойын айтып, саңлақ жанр – сатирадағы еңбегін жоғары бағалады. Қазақстан Жазушылар одағының облыстағы өкілі Қаршыға Есімсейітова оқырманға жол тартқан жаңа туынды қазақ әдебиетіне қосылған құнды қазына екенін атап өтті. Ақын Серік Ыдырысов жүрекжарды лебізін арнап, шығармашылығына шынайы ықыласын білдірді. Облыстық «Сыр бойы» газетінің бас редакторы, Қазақстан Журналистер одағы облыстық филиалының төрағасы Қуат Шарабидинов қалам иесінің шығармашылығынан бөлек, адами биік болмысы, ағалық, азаматтық тұлғасы жайлы сөз қозғап, қаламдастарының сый-құрметін жеткізді.
Рухани тәлімі мол жиынды облыстық кітапхана директоры, тарихшы ғалым Нұрлыбек Мыңжас жүргізді. Кітаптың тұсаукесер рәсіміне облыстық ардагерлер кеңесінің төрағасы Серік Дүйсенбаев, облыстық мәслихат депутаты Жорабек Нұрымбетов, ардагер журналист Қайырбек Мырзахметұлы қатысты.
Кеш барысында «Мереке-думан» халықтық әзіл-сықақ отауының орындауында автордың «Осындай да ойын болады екен?..» интермедиясы қойылып, көрерменге керемет көңіл-күй сыйлады. Сондай-ақ кеш аясында оқырмандар назарына «Сатира сайыпқыраны» тақырыбында ұйымдастырылған кітап көрмесі таныстырылды.
Айта кетейік, жазушының бұған дейін жарық көрген «Жайма базар», «Қатырамыз», «Сүйінші дайындаңыздар», «Ауылдағы айтқыштар», «Қияға қонған қыран», «Беласар», «Сыпыра сыйлық», «Үшінші тайм», т.б кітаптары қалың оқырманның ыстық ықыласына ие болды. Сонымен қатар, «Жұлдыз», «Ара – Шмель» журналдары, «Қазақ әдебиеті» басылымының белсенді авторы. Облыстық «Сыр бойы» газетінің сатиралық бет редакторы, меншікті тілшісі қызметтерін атқарды.
«Әр кәллада бір қиял» атты сиясы кеппеген жаңа кітап «Кәсіби жөтел», «Гөй-гөй», «Келіншектал әуені», «Жүйелі сөз жүлдесі» деп аталатын төрт бөлімнен тұрады. Кітаптың жауапты редакторы белгілі сатирик Ермахан Шайхы: «Ел адамдарының өздеріне ғана тән аңғалдау, кейде әпенділікке тән мінездері мен қылықтарын туындысына арқау ете отырып, айналамызда болып жатқан тосын көріністер мен қоғамдағы келеңсіздіктерді сын садағына алады. Оқырман күле отырып, күрсінетін жайттарға тап болып жатса, бұл шұрайлы тіл мен астарлы баяндаудың әсері деп түсінерсіз» деп пікір білдірген екен. Нақты берілген баға да осы болса керек.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
