Докторантураға түсу ережелеріне өзгертулер енгізілді

431

0

Биылдан бастап докторантураға қабылдау емтиханы электрондық форматта жүргізілетін болады. Бұл туралы Білім және ғылым министрлігінің Telegram каналында жарияланды, деп хабарлайды ҚазАқпарат.

Атап айтқанда, үміткерлер компьютерде отырып эссе жазады, докторантурада оқуға дайындығын растау үшін тест тапсырады және білім беру бағдарламасы тобының бейіні бойынша емтихан тапсырады.

«Биыл докторантураға түсу ережелеріне бірқатар өзгеріс енгізілді. Докторантураға қабылдау емтиханы алғаш рет тестілеу орталықтарының базасында дербес компьютер арқылы электрондық форматта өтеді. Өткен жылы бұл тәсіл магистратураға қабылдау кезінде қолданылған болатын. Бұл – қабылдау емтихандары тек тестілеу форматында өтеді деген сөз емес. Болашақ докторанттар ЖОО-лар бекіткен тақырыптар бойынша эссе жазады. Қабылдау емтиханының қорытынды бағасы эссе, докторантурада оқуға дайындық тесті және бейінді емтихан бағаларының жиынтығы болып сналады», – деді ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев.

Докторантураға өтініш қабылдау 3 шілдеде басталып, 3 тамызға дейін жалғасады, сондай-ақ білім беру бағдарламаларына түсу емтихандары 4-20 тамыз аралығында өтеді. Докторантураға қабылдау 28 тамызда аяқталады.

Бұдан бұрын хабарланғандай, докторлық диссертацияларды қорғау онлайн режимде жүргізіледі.

Пікірлер жоқ. Бірінші болыңыз!

Пікір жазыңыз