Былтыр еліміздің, оның ішінде өңірдің де денсаулық сақтау саласы үшін ауыр кезең болғаны белгілі. Белгісіз індет белең алған алғашқы уақытта отандық медицина абдырап қалғаны рас.
Өйткені дүниежүзінің озық елдерінің өзі тосыннан келген кеселмен күресте қиындықтарға тап болып жатқанда, біздегі жағдайдың басқаша болуы мүмкін емес те еді. Алайда, дұрыс қабылданған шешімдер, атқарылған нақты шаралар мен медицина қызметкерлерінің табанды күресінің арқасында кеселді еңсерудің сәті түсті.
Биылғы 1 қаңтардағы мәлімет бойынша өңірде медициналық ұйымдарға тіркелген халық саны 793184 адамды құраса, оның 267411-і, яғни, 33,7 проценті – балалар. Тұрғындарға 23 стационарлық, 21 амбулаториялық-емханалық ұйым қызмет көрсетеді.
Маман тапшылығын төмендету мақсатында былтыр облысқа 109 дәрігер тартылып, олардың 36 проценті ауылдық жерлерге жіберілген. Нәтижесінде медициналық-санитарлық көмек көрсету ұйымдарының дәрігерлермен қамтылуы 90 процентті құраған. Сондай-ақ, кейінгі 3 жылда дипломнан кейінгі резидентурада 61 маман, әкімнің арнайы грантымен 100 жалпы тәжірибелік дәрігер бакалавриат бойынша білім алуда.
Жоғарыда айтып өткеніміздей, пандемиямен күрес шаралары аясында облыс әкімінің нақты қолдауымен біршама жұмыстар атқарылды. Атап айтқанда, Жалағаш ауданында 100 төсектік аурухана пайдалануға берілді. Жалағаш ауданы Ақсу елді мекенінде және Арал ауданы Шижаға елді мекенінде дәрігерлік амбулатория бой көтеріп, ел игілігіне қызметін бастады.
Медициналық көмектің қолжетімділігі мен сапасын арттыру мақсатында өңірдегі медициналық мекемелер жалпы құны 633,9 млн теңгенің құрал-жабдықтарымен қамтылды. Оның ішінде 11 стационарлық, 3 флюорографиялық рентген аппараты мен 2 УДЗ құрылғысы сатып алынған. Нәтижесінде саланың құрал-жабдықтармен қамтылу көрсеткіші 77 процентке өскен. 2019 жылы бұл көрсеткіш 70,1 процентті құраған болатын.
Шалғайдағы елді мекен тұрғындарына медициналық көмектің қолжетімділігін қамтамасыз ету мақсатында республикалық бюджет есебінен 2 жылжымалы медициналық кешен, жедел жәрдемнің қолжетімділігін арттыруда 44 санитарлық автокөлік сатып алынды.
Осындай жүйелі жұмыстардың нәтижесінде облыс республикада коронавирус инфекциясының таралуы бойынша «жасыл аймақ» қатарынан көрініп келеді. Бұл, әрине, облыс басшылығы мен медицина мамандарының жүйелі жұмыс нәтижесі деп бағалаған жөн.
>>> Біздің Facebook, Instagram парақшаларымыз бен Telegram каналымызға жазылыңыз! <<<