Кеше облыс әкімі Гүлшара Әбдіқалықова бизнес қоғамдастық өкілдерімен кездесу өткізді. «Байқоңыр» ӘКК» АҚ бастамасымен ұйымдастырылған шараға кәсіпкерлер, мемлекеттік мекемелер мен қаржы институттарының басшылары қатысты.
Аймақ басшысы пандемия кезінде экономикалық табыс көлемін сақтап қалу үшін бизнесті әртараптандыру, жаңа инвестициялық жобалар тарту арқылы кәсіпкерлермен бірлесіп жұмыс істеудің тиімділігін атап өтті.
– Шағын және орта бизнес иелері кәсібінің тоқтап қалуы, мұнай өндірісі көлемінің азаюы экономикаға әсер етеді. Бұл жағдайдан шығу үшін әртүрлі қадамдар жасауға тиіспіз. Биыл біз 270-ке жуық әртүрлі жобалар қамтылған арнайы экономикалық даму картасын жасадық. Оның ішінде биыл 71 жоба басталып та кетті. Инвесторларды тарту арқылы да әртүрлі жобаларға қаржы бөлінбек. «Байқоңыр» ӘКК» АҚ барлық қаржы институттары мен екінші деңгейдегі банктерге әлеуетті жобаларды ұсынады, сондай-ақ өңір кәсіпкерлерінің проблемалық мәселелерін шешуге ықпал ететін болады. Бұл ретте банктердің назарынан тыс қалған жобаларды қолдау мақсатында ауыл кәсіпкерлерін жеңілдікпен несиелендіруге бағытталған «Қызылорда» өңірлік инвестициялық орталығының қызметін 2025 жылға дейін ұзарттық. Аймақтың дамуына, жаңа жұмыс орындардың ашылуына ықпал жасайтын жобаларды қолдайтын боламыз, – деді облыс әкімі.
Кездесуде облыс әкіміне өндіріс, ауыл және балық шаруашылығы, халыққа қызмет көрсету салаларын дамытуды көздейтін ірі және шағын 12 инвестициялық жоба таныстырылып, 2 жоба қайта толықтырылуға берілді. Жалпы сомасы 3 613 млн теңгені құрайтын бұл жобалар 262 жаңа тұрақты жұмыс орнын құруды көздейді.
Жиынға шақырылған әрбір кәсіпкер өз жобаларының маңыздылығын қорғап, банк арқылы қаржыландыру тетіктеріне тоқталып, облыс әкімінің назарына ұсынды. Мәселен, арнайы техника сатып алу, құрылыс дүкенін ашу, сантехникалық бұйымдар өндірісі, мектеп оқушылары арасында барлық пәндер бойынша турнирлер ұйымдастыру сынды жобалар қаралды. Сонымен бірге өңірдің өндірістік әлеуетін көтеруге арналған әйнек өндірісі мен мұнай қалдықтарын өңдеу, жиһаз цехын іске қосатын жобалар қолға алынбақ. Ауыл шаруашылығы саласында да бірқатар жобалар таныстырылды. Атап айтқанда, кәсіпкерлер түйе және ірі қара мал өсіру, бал өндіру, жылыжай салу, балық шаруашылығын дамыту жобаларына қаржылай қолдау сұрады.
Мәселен, «Мырзабай» шаруа қожалығы 20 жылдан бері егін, мал шаруашылығымен айналысып келеді. Жақында олар бал арасын өсіру ісін қолға алды. Енді экспортқа өнім шығаруды көздеп отыр. Оған сұраныс барын да жеткізді. қожалық иесі шаруашылығын дамыту мақсатында қолдау күтетінін айтты.
Кездесу барысында екінші деңгейдегі банктер мен «Байқоңыр» ӘКК» АҚ бизнес-жобаларды одан әрі қаржыландыру және іске асыру үшін инвестициялық жобаларды іріктеп алып, кәсіпкерлердің бірқатар ұсынысын қолдады.
Облыс әкімі жиын соңында «Байқоңыр» ӘКК» АҚ барлық қаржы институттарының интеграторы және өңірдегі әлеуетті жобаларды қолдау жөніндегі оператор болатынын атап өтіп, бірқатар тапсырма берді.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
