Облыс прокурорының міндетін атқарушы Мақсат Қазиевтің төрағалық етуімен қылмыстық құқық бұзушылық профилактикасы бойынша ведомствоаралық жедел мәжіліс өткізілді деп хабарлайды облыстық прокуратура.
Жиынға облыс әкімінің орынбасары Серік Ахмет және құқық қорғау органдарының басшылары қатысты. Аудандармен бейнебайланыс жасалып, пікір алмасу болды.
Жедел басқосуға Қызылорда қаласы мен Шиелі ауданында қару қолдану арқылы орын алған топтық төбелестер себеп болып отыр.
Мәжілісте сондай-ақ, өңірдегі қылмыстық ахуал мен оның ішінде өсім алған түрлерімен күрес мәселесі талқыланды.
Жалпы қылмыс 9%-ке төмендегенімен, жекелеген түрлері бойынша өсім бар. Оның ішінде аса ауыр қылмыстар 19%-ке, кісі өлтіру 6%-ке, қорқытып алушылық 75%-ке, зорлау 30%-ке, алаяқтық 40%-ке өскен. Осының ішінде алаяқтық қылмыстардың тең жартысы интернет арқылы жасалып, өткен жылдан екі есе көбейген. Бұған еліміздегі карантиндік шаралар кезінде азаматтардың интернет-дүкендер мен онлайн жеткізу көмегіне жиі жүгінуі себеп болған.
Сонымен қатар онлайн несие рәсімдеу үшін азаматтар интернет арқылы жеке мәліметтерін (аты-жөні, ЖСН, банк картасының деректемелері) ұсынып, несие алу жағдайлары жиілеген.
Осыған байланысты интернетте алаяқтардың арбауына түсуіне жол бермеу бағытында құқықтық насихат жұмыстарын жүргізу белгіленді.
Ал мал ұрлығына қарсы елді мекендерде малды құжаттандыру (сырғалау, таңба басу, чип тағу, т.б.) және ауылдарды падашылармен қамтамасыз ету жұмыстарын ұйымдастыру тапсырылды.
Пробациялық есепте тұрған тұлғаларды қатаң бақылауға алып, тиісті шараларды жүргізу белгіленді.
Кәмелетке толмағандардың қорғалуы бойынша білім беру ұйымдарымен бірлесіп, тұрмыстық жағдайы қолайсыз отбасында тәрбиеленетін және девиантты мінез-құлықты балалармен әлеуметтік-психологиялық жұмыстар жүргізу мәселесі қаралды.
Сонымен қатар облыс прокурорының биылғы ақпандағы өкіміне сәйкес, Қызылорда қаласындағы 14 учаскелік аймақтарға апта сайын рейдтік іс-шаралар ұйымдастырылуда.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
