Қазалыға 20 мың тонна көмір қажет

69

0

Қазалы ауданында қысқы жылу беру маусымына дайындық жұмыстары басталып кетті. Бүгінгі таңда аудан тұрғындарына қажетті қатты отынның мөлшері белгіленіп, оны ауданға жеткізу жағы қарастырылуда.

Кеше аудан әкімі Мұхтар Оразбаев көмір тасымалдаушы кәсіпкерлермен кездесті. Кездесуде аудан тұрғындарын қатты отынмен қамтамасыз ету жайы сөз болды.

– Қысқы жылу беру маусымында ауданға 20 мың тонна көмір қажет деп жоспарлап отырмыз. Ауданымызға көмір Қарағанды, Павлодар облыстарындағы кеніштерден тасымалданатындықтан, өзіндік құнының жоғарылайтыны белгілі. Дегенмен біз халыққа қатты отынды қолжетімді бағада ұсынып, тапшылықты болдырмау үшін бірлесіп жұмыс жасауымыз қажет.Бүгін тиісті сала басшыларымен бірге осы мәселелерді өздеріңізбен бірге талқылау үшін кездесіп отырмыз, – деді аудан басшысы.

Басқосуда көмір тасымалдаумен айналысатын жеке кәсіпкер Нұрлан Тұрсұмұратов, «Қазалы Тұлпары» ЖШС директоры Мұхтар Тоғымов өз ой-пікірлерін айтты. Кәсіпкерлердің айтуынша ауданға қажетті қатты отынмен қамтамасыз етуге мүмкіндік мол. Жергілікті кәсіпкерлерден бөлек сырттан келіп көмір сатушылар да бар.

Кездесу соңында аудан әкімдігі мен кәсіпкерлер қысқы жылу беру маусымында қатты отын бағасын тұрақты ұстап тұру мақсатында екі жақты меморандум жасасты.

Пікірлер жоқ. Бірінші болыңыз!

Пікір жазыңыз