Елдің ақпараттандыру саласына байланысшылардың қосқан үлесі аса зор. «Қазақтелеком» АҚ облыстық филиалы қызметкерлері кәсіби мереке – байланыс және ақпараттандыру қызметкерлері күнін биыл да атап өтті.
– Әлем елдері арасын жақындату, ақпарат алмасу және жан-жақты коммуникация орнату жолында теле, радио, почта қызметтері мен жедел қарқынмен дамып келе жатқан интернет желілері адам өмірінің ажырамас қажеттілігіне, үлкен көмекшісіне, еліміздің стратегиялық маңызды саласына айналған.Үздіксіз коммуникацияны қамтамасыз ету – күнделікті қиын жұмыс, озық жабдықтар мен заманауи технологияларды қолдана отырып, жаңа жобалармен үнемі жұмыс жасау оңай емес екенін біз жақсы білеміз, – деді өңірлік коммуникациялар қызметінде өткен брифингте облыстық ішкі саясат басқармасының басшысы Мира Қазбекова.
Нақты кезеңде «Қазақтелеком» АҚ Оңтүстік өңірлік телекоммуникация дирекциясы – облыс тұрғындарын сапалы байланыспен қамтамасыз етіп отырған бірден-бір іргелі ұжым. Бұған қоса, компания телекоммуникация қызметтерінің кең спектрін ұсынады. Мәселен, нақты кезеңде Сырдария өзенінің сол жағалауындағы жаңа көпқабатты үйлерді кеңжолақты желіге қосу ісі белсенді жүріп жатыр. Онда жаңа аудандардың құрылысы қарқынды. Қазіргі кезде 54 жаңа ғимараттың 22-сі телефондандырылған, қалғандары қосылу сатысында. Жаңа ғимараттардың 280-нен астам тұрғыны интернетке талшықты-оптикалық байланыс желілері арқылы қосылып отыр.
Цифрлық теңсіздікті жою мақсатында былтыр «Қазақтелеком» «талшықты-оптикалық байланыс желілері технологиясы бойынша ауылдық елді мекендерді кең жолақты қолжетімділікпен қамтамасыз ету» ауқымды жобасын іске асырды. Облыста аталған жоба аясында 14 елді мекенде 52 мемлекеттік мекеме жоғары жылдамдықты интернетке қосылды. Сондай-ақ, ауыл тұрғындарын жоғары жылдамдықты интернетпен қамтамасыз ету жұмыстары жүргізілуде.
Бұған қоса, Жаңақорған ауданы әкімдігімен бірлесіп Жайылма ауылының тұрғындарына көп нүктелі технология бойынша трафикті сымсыз беру үшін радиомост ұйымдастырылды. осы технологиямен сымсыз байланыс Арал ауданының Тоқабай және Қазалы ауданының Шәкен ауылына жеткізілді. Нәтижесінде аталған елді мекендердегі ондаған үй жоғары жылдамдықты интернетке қосылды.
Өңірді цифрландыру шеңберінде «Қазақтелеком» АҚ облыс әкімдігімен бірлесіп, халық үшін әлеуметтік пайда ұсынуға бағытталған SmartCity элементтерін енгізу бойынша жұмыс жүргізуде. Олардың ішінде қауіпсіздікті арттыру, қалалық сервистер қызметтеріне қолжетімділік, шығындарды азайту және ресурстарды тұтыну бағыттары бар. Мәселен, Қызылорда қаласында оқушылардың тәртібін бақылау және қауіпсіздігін арттыру мақсатында «Мектептерде бұлтты бейнебақылау» пилоттық жобасы қолға алынып, іске асырылды. Жоба шеңберінде 14 мектепте 30 күндік деректер сақталатын 420 бақылау камерасы орнатылды.
Қызылорда қаласы корпоративтік сату орталығының директоры Ержан Әбибуллаұлының айтуынша, «Қазақтелеком» АҚ өзінің дәстүрлеріне бай және әрбір қызметкердің үлесін бағалайды. Жыл сайын кәсіби мерекеде компания басшылығы жетістіктерге жеткен қызметкерлерді көтермелеп отырады. Компания бизнес-процестерді оңтайландырып, корпоративтік құндылықтарды әрбір қызметкерге жақын ете алды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<