Қызылорда облысы аумағында 3444 нысан «Ashyq» жүйесіне қосылған. Бұл туралы облыс әкімінің орынбасары Балжан Шәменова мәлім етті, деп хабарлайды ҚазАқпарат тілшісі.
«Облыс көлемінде ҚР Бас мемлекеттік санитариялық дәрігерінің 2021 жылғы 26 тамыздағы №37 қаулысында көрсетілген нысандардың 33 түрі бойынша бүгінде 3444 кәсіпкерлік нысан «Ashyq» жүйесіне қосылып, жұмысын жалғастырып жатыр. Сондай-ақ, арнайы мониторингтік топ «Ashyq» жүйесімен жұмыс істейтін 2617 нысанның қызметін тексерді. Аталған жүйемен жұмыс істейтін нысандардан «қызыл» және «сары» мәртебесіне қарамастан карантин талабын бұзды деген 1054 хабарлама келіп түсті. Осы орайда 108 жеке тұлғаға қатысты әкімшілік хаттама толтырылып, 4 725 540 теңге көлемінде айыппұл салынды», – деді Б. Шәменова ОКҚ-де өткен баспасөз мәслихатында.
Сондай-ақ, әкім орынбасары облыстағы мониторингтік топ жұмысы туралы сөз қозғады.
«Жыл басынан бері карантин талаптарының сақталуы барысын бақылау мақсатында мониторингтік топ өкілдері 14 040 нысанға 4 391 рейд жүргізді. Нәтижесінде 772 карантин талаптарын бұзу фактісі анықталып, жауаптыларға жалпы сомасы 50 606 069 теңге көлемінде әкімшілік айыппұл салынды. Оның қатарында 1 заңды тұлға, 42 жеке кәсіпкер, 8 лауазымдық тұлға, 230 жеке тұлға және 491 отбасылық іс-шара өткізуге қатысты», – дейді ол.
Оның айтуынша, карантин талаптарын бұзған нысандар бойынша 3 материал сотқа жолданған.
>>> Біздің Facebook, Instagram парақшаларымыз бен Telegram каналымызға жазылыңыз! <<<
