Ұлы Отан соғысының ардагері Тәжмахан Қойшыбаев Қармақшы ауданының қазіргі Алдашбай ахун ауылында туып-өскен, бастауыш мектептен білім алған. Жастық шағы ел басына күн туған ашаршылық жылдарына тура келіп, еңбекке ерте араласты. Үлкен ағасы Сәдуақас әскерге аттанып, әке-шешесі мен қарындастарына қамқорлық жасау жауапкершілігі өзіне жүктелді.
Ұлы Отан соғысы басталғанда Қармақшы аудандық комиссариатынан соғысқа аттанды. Ағасы да әскерден кейін соғысқа қалдырылған еді.
Тәжмахан Қойшыбаев 1942-1943 жылдары Калинин майданында Ржев қаласын азат етуге қатысқан. Екінші дүниежүзілік соғыс тарихына үңілсек, бұл жерде болған қырғынды кейінгі жылдары «Ржев қанды қасабы» деп атап жүр. Жауынгерлер алдына қойған мақсатына жету үшін күші өзінен әлдеқайда басым жаумен соғысып, зор шығынға ұшыраған.
Ржев түбіндегі шайқас төрт жылға созылған соғыстың ең шешуші тұстарының бірі болды. Қаншама боздақ жер құшқан сол қанды қырғынның куәсі болған орыс ақыны Александр Твардовский:
«Мен Ржевтің түбінде өлдім,
Бақытты болуды сіздерге
бұйырып,
Отанға адал болуды
тапсырдым,
Өлілер кетсе де,
кеткен жоқ күйініп,
Бізде бір ұлы бақыт бар –
Отан үшін құладық,
Оны біз құтқару үшін
қиылдық» деп жырлаған.
Майдангер 1944 жылы ауыр жарақат алып, далалық әскери госпитальға түсіп, ұзақ емделеді де, қайтадан майданға аттанады. Көп ұзамай бір аяқ, бір қолдан жарақат алып, әскери дәрігерлердің қорытындысымен елге ІІ топ мүгедегі болып оралған.
1945 жылдың басында еңбекке араласып, отбасын құрды. Қатардағы колхозшыдан бастап бөлім меңгерушілігіне дейінгі қызметтерді адал атқарған. Отан қорғаудағы жауынгерлік және елге жасаған қызметі еленіп, бірнеше орден, медаль алған. Атап айтқанда «Еңбек ардагері», І дәрежелі «Отан соғысы» орденімен, Кеңес Одағының маршалы Г.Жуков атындағы медальмен марапатталған.
Жары Бибіхадишамен бірге 4 ұл, 4 қыз тәрбиелеп өсірген.
Қойшыбайұлы Тәжмахан 1997 жылы 25 қаңтарда 77 жасында дүниеден өтті. Бүгінде не–мере, шөберелері өмірі өнегеге толы Ұлы Отан соғысының ардагерін еске алып, мақтан тұтады.
Гүлжазира ЖАЛҒАСОВА,
«Сыр бойы»
