Бекзат өнерге баулыған «Балбұлақ»

447

0

Мың бұралған бишілер, көздің жауын алатын сәнді көйлектер. Талдырмаш балдырғандар аяқ ұшын жерге қадап, бойын тіктегенде ерекше  мүсінге айналады. Саусақ иірімі сан құбылғанда таңдай қағасың. Бұл – биші балапандардың өнері. Олар кішкентай болса да, өнерді терең ұғынады, жүрекпен сезінеді. Музыка үнімен үндеседі, тілдеседі. Осылайша, қазақ ұлттық би өнерінің өркендеуіне өз үлестерін қосып келеді.

Балалар би өнері жылдан-жылға дамуда. Ансамбльдер құрылып, бүлдір­шін­дердің түрлі байқауларда, әлем елдерінің сахналарында өнер көр­сетіп, жетістікке жеткенін жазып та жүрміз.  Қызылорда қаласындағы Өнер мектебінің «Балбұлақ» халықтық (үлгілі) би ансамблі – бекзат өнердің биігіне самғаған топ.

Өнер ұжымының 22 жылға жуық тарихы бар. Осы уақыт аралығында 200-ден астам бүлдіршінді баулып, түлетті. Елімізге белгілі бишілердің қанат қағуына септігін тигізді. Бұл  ұжымнан шыққан бишілер белгілі ән-би ансамбльдерінің белді мүшесі атанды.

Ұжым 1998 жылы қалалық өнер мектебі жанынан  Ақмарал Қойшығұлованың жетек­шілігімен құрылды. Репертуарларына қазақ биінен өзге түрлі ұлт өкіл­дері­нің билерін қосты. Облыс, қала көлеміндегі мәдени іс-шаралардан қалыс қалған емес. Қазір би ан­самбліне Әсел Ыдырысова жетек­шілік етеді. 2012 жылы  «халықтық» атағын алды.

– Балаларды би сыныбына қабылдаған кезде олардың қимы­лына, икеміне қарап таңдаймыз. Алғашқы би жаттығулары кезін­де икемделіп кеткендері сы­нақ­тан өтеді. Кейбір ата-аналар балаларының биге деген қызы­ғушылығын байқап, ынтасы бол­ғандықтан жетектеп әкеледі. Міне, мұндай балалар тез бейім­деледі. Байқау кезінде іріктеліп, дайындықтан өткендері өнер көрсетеді. Өнер мектебі оқушы­ларының бәрі де өнерлі. Жетістікке жету үшін көп еңбек қажет. Сондықтан баланың өнерін дамытып, шыңдау – ұстаздың міндеті, – дейді ансамбль жетекшісі Әсел Ыдырысова.

Үлкен бөлменің қабырғасы түгел айна. Балалар би қозғалысын жасап жатыр. Жетекші үздіксіз ескертіп, жігерлендіріп, шабыттандырып сөйлейді.  Бұл – күнделікті дайындық. 

– Пандемияға байланысты көптеген жоспар шегеріліп отыр. Дегенмен, қол қусырып қалған жоқпыз. Балалар карантин талаптарын сақтай отырып, бөлініп дайын­дыққа келуде. Сонымен қатар онлайн-концерттер беріп жатырмыз. Біз бес жыл сайын халықтық дәрежемізді қорғаймыз. Есеп береміз, нәтиже көрсетеміз. Балалар би өнерінде өзіндік орнымызды қалыптастырғымыз келеді. Сол себепті уақыттан ұтылмау керек, – дейді ұжым жетекшісі.

Балалар би ансамблінің жеткен жетістігі аз емес. Ұлттық би өнерін дәріптеп-насихаттап келеді, сырт мемлекеттерде де өнер көрсетті. Облыстық, республикалық және халықаралық байқауларға қатысып, олжалы оралды. Мәселен, «Ботақан», «Жұлдызды би алаңы», «Алатау шыңы», «Бозторғай» бала­лар шығармашылығына ар­нал­­ған би байқаулары, «Шабыт» Халықаралық жас та­лант­­­тар фестивалі, «Дельфий ойын­­дары», «Дала сазы» рес­публикалық сайыстарға және «Айгөлек» телевизиялық балалар шығармашылығына арналған до­даға қатысып, жүлделі орындарды иемденді.

Сонымен қатар былтыр Халықаралық International Festival «Golden Time London-9» шығар­машылық байқауына қатысып, «Ұлы дала рухы» неоқазақ биін қойып, бірінші орын алды. Ал, Халықаралық «Жұл­дызАртҚазақстан» байқауында бас жүлдені жеңіп алып, Түркия елін­де өтетін байқаудың тегін жол­дамасына қол жеткізді. Сондай-ақ, «Қабілет» республикалық ғылыми-әдістемелік орталығының ұйымдастыруымен «Кемел елдің келешегі» атты энциклопедияға еніп, арнайы медальмен марапат­талды. Тізбектеп айта берсек, «Балбұлақ» халықтық би ансам­блінің  жеткен жетістігі мен бағын­дырған биігі көп, алар асуы бар.

Өнер ұжымының осындай дәрежеге жеткені – жетекші, яғни, ұстаздың еңбегі. Әсел Ыдырысова – өнерге берілген жан. Ол жұмысының жемісін көру үшін күш-жігерін аяған емес.

Біз де «Балбұлақ» халықтық балалар би ансамблінің әлі де талай белесті бағындырып, еліміздің атын әйгілеп, қазақ би өнерін әлемге паш ете беретініне сенімдіміз.

Сара АДАЙБАЕВА,

«Сыр бойы»

Пікірлер жоқ. Бірінші болыңыз!

Пікір жазыңыз