Жаңа жыл қарсаңында Сыр өңірін ерекше елең еткізген жағымды жаңалықтар болды.
Алғашында «Qyzylorda-nеws» ақпараттық агенттігінің бас редакторы Нұрсұлтан Мықтыбаев “Үркер – 2020” ұлттық сыйлығын алып , қомақты сыйақы иеленді. Айтыс ақтаңгері Мұқтар Ниязов «Алтын домбыра» бәйгесінің үшінші мәрте жеңімпазы атанып, қасиетті қара домбыраның Сыр елінде қалуына қол жеткізді.
Республикаға танымал белгілі жыршы Күнсұлу Түркпенова «Дарын» мемлекеттік сыйлығының иегері атанды.
Ежелден ән қонып, жыр ұялаған киелі Сыр топырағының дарынды перзенттерінің табысы мерейімізді өсірді, көгімізде жанған жұлдыздары жарқырай түсті.
Журналистика саласындағы жоғары нәтижеге жеткен Нұрсұлтан Мықтыбаев мектеп қабырғасында жүрген кезінің өзінде облыстық, республикалық басылымдарға хат-хабар жолдап тұратын. Түрлі тақырыптарда дайындаған материалдары облыстық, орталық басылымдарда жарық көре бастады.
Университетті бітіргеннен кейін журналистік қызметін Батыс Қазақстан облысында жалғастырды. Ол жақта да абыроймен еңбек етті. Бүкіл республикаға танымал журналист болды. Сол өңірде тұратын көрнекті қазақ ақыны Ақұштап Бақтыгерееваның қамқорлығы мен қолдауын көрді.
Сыр жұртшылығына айтыскер ақын Мұқтар Ниязовтың есімі жақсы таныс. Ол табиғи талантымен біздің ұлтымызға ғана тән айтыс өнерін алға сүйреп, жаңа деңгейге көтерді. Ондаған жылдар бойы айтыс аламанында жүзден озған жүйрік атанып жүр. «Алтын домбыра» бәйгесінің үш мәрте жеңімпаз атануы осының айғағы.
Ұлы Мұхаң Мұхтар Әуезов атақты Жамбыл Жабаевтың айтыс кезінде шапшаң айтылған ұтымды ұйқастарына риза болып, «Жамбылдың жадында миллион ұйқас бар. Оны қажет кезінде пайдалана алады» деген екен. Мұқтар Ниязовтың да айтыс кезінде орамды ойлары шебер сомдалған өлеңмен өрнектеліп, тасып, төгіліп жатады.
«Дарын» мемлекеттік сыйлығын иеленген аса талантты қызымыз Күнсұлу Түркпенді жыр дүрдүлі, Сыр бұлбұлы деуге болады. Ол мектепті қала іргесіндегі Тасбөгетте бітірді. Қызылорда мемлекеттік университетінде оқып, қазір өнер саласында өнімді еңбек етіп жүр.
Күнсұлу мектеп қабырғасында жүрген кезінен түрлі концерттерде жыр айтып, елді ерекше елең еткізді. Соңғы кездерде республикалық түрлі байқауларда топ жарып, тыңдаушыларының шынайы құрметі мен ілтипатына ие болуда. Біз Күнсұлуға жыр көгінде еркін самғап, абырой биігінен көріне беруіне шынайы тілектестігімізді білдіреміз.
Махмұтбай ӘМІРЕҰЛЫ,
Қазақстан Жазушылар одағының мүшесі
>>> Біздің Facebook, Instagram парақшаларымыз бен Telegram каналымызға жазылыңыз! <<<