Қызылорда облысының полицейлері есірткі жеткізу арнасының жолын кесті, деп хабарлайды ҚазАқпарат.
Қызылорда облыстық Полиция департаменті есірткі қылмысына қарсы іс-қимыл басқармасының қызметкерлері жедел-іздестіру іс-шараларын жүргізді.
Аталған шара барысында Қызылорда қаласында синтетикалық есірткі затын сақтаған Ақмола облысының 20 жастағы тұрғыны ұсталды.
«Ол орналасқан қонақүйдегі бөлмесіне тінту жүргізу барысында есірткі сатуға дайын үш полиэтилен пакетіне салынған сұр түсті ұнтақтар заттай дәлелдеме ретінде алынды. Сараптама қорытындысымен тәркіленген ұнтақтың а-пирролидиновалерофенен немесе a-PVP психотроптық заттарға жататыны белгілі болды. Ақмола облысының тұрғыны аталған синтетикалық есірткі заттарына интернет желісі арқылы тапсырыс қабылдап, Қызылорда қаласының аумағындағы 10 жерге жасырған», – деп мәлім етті Қызылорда облыстық полиция департаментінен.
Ведомство мәліметінше, аталған дерек бойынша сотқа дейінгі тергеп-тексеру әрекеттері жүргізілуде. Күдікті Қызылорда қалалық полиция басқармасының уақытша ұстау абақтысына қамаққа алынды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
