– Әділбек Бөрібайұлы, Құрылтай сайлауына санаулы күн қалды. Маңызды саяси науқанға Қызылорда өңірінің дайындығы қалай?
– Президент Жарлығымен 23 тамызға бекітілген Құрылтай сайлауы еліміз үшін аса маңызды саяси науқан. 54 күнді қамтитын электоралдық кезең ҚР Орталық сайлау комиссиясымен бекітілген Күнтізбелік жоспарға сай жүргізілуде.
Аймақта 9 аумақтық, 386 учаскелік сайлау комиссиясы құрылып, 2783 комиссия мүшесі жұмыс жасауда. Барлық комиссиялар кезекшілік кестесіне сай сайлаушылардың сауалдарына жедел жауап беруге дайын.
Науқан аясында Қызылорда қаласында 7 учаске, Қазалы және Шиелі аудандарында 1 жаңа учаске ашылып, қажетті құрал-жабдықтармен қамтамасыз етілді.
Дауыс беру күні барлық комиссия мүшелеріне сайлаушылар тізімімен жұмыс, бюллетень беру, байқаушылар мен сенім білдірілген адамдармен заң шеңберінде жұмыс жүргізуге қажетті алгоритмдер түсіндірілді.
Мүгедектігі бар дауыс берушілер үшін арнайы бұрыштар және қажетті трафареттер мен аудиороликтер жеткізілді. Дауыс беру күні 67 инватакси сайлаушыларға қызмет етеді.
– Комиссия мүшелерінің білім деңгейі қандай? Оқыту жұмыстарына қаншалықты мән берілді?
– Облыста 2720 учаскелік сайлау комиссиясының мүшесі бар. Олардың 95 пайызы тәжірибелі, бірқатар науқандарды кәсіби түрде атқарып жүрген мамандар деуге болады. Әлбетте, оқытуға баса мән берілді.
Комиссия мүшелерін білімін жетілдіруге арналған көшпелі оқыту семинары барлық аудандарды қамтыды. Облыста 1344 комиссия мүшесі арнайы оқытудан өткізілді. Әрі қарай каскад әдісімен 1376 комиссия мүшесі білімдерін арттыруда. Комиссияға жаңадан келген 140 маманға талдау жүргізіп, оларды оқытуға ерекше екпін берілді.
Оқытуға бөлінген уақыттың 30%-ы теорияға және 70%-ы практикалық әдістерге (рольдік ойындар, кейс-тесттер, квиз-ойындары, кейстік жағдайларды талдау, т.б.) арналды. Сонымен қатар, комиссия мүшелерінің білімі ON-тест жүйесі арқылы тексерілді.
– Сайлаушылар нені білуі керек?
– Өңірде 500 591 азамат сайлаушылар тізіміне енгізілді. Қазіргі таңда учаскелер сайлаушылардың есептен шығару және үйден дауыс беру сынды сұраныстарына сай қызмет етуде. Бүгінгі күні облыста 134 тұрғын есептен шығару куәлігін алды.
Тұрғындарымыз өз учаскесін «Өзіңді сайлаушылар тізімінен тексер» атты платформа арқылы үйден шықпай-ақ көре алады. Мұны жергілікті әкімдікпен бірлесіп атқардық.
saylau.orda.gov.kz платформасының көмегімен 70 мыңға жуық сайлаушыларымыз өз учаскесін тапты. Бұл платформа «Смарт Қызылорда» мобильді қосымшада және телеграм (sailau_kzoBot) желісінде қолжетімді.
Сонымен бірге 193 учаскеде онлайн сервистер жұмыс істеп тұр. Бұл учаскелер сайлаушылардың ЖСН-і арқылы оның қайда тіркелгендігін анықтап бере алады.
Маңызды мәселенің бірі ретінде айтарым, дауыс беру күні тізімде жоқ азаматтарды уақытша тіркеумен айналысатын 5 арнайы учаске жұмыс істейді. Мұнда халыққа қызмет көрсету орталығының мамандары тұрғындарды уақытша тіркеп, дауыс беруіне мүмкіндік жасайды.
Мұнан бөлек аймақта 109 бірыңғай байланыс орталығы және 8 call-орталық тұрақты түрде қосулы.
23 тамыз күні дауыс беру 07.00-ден 20.00-ге дейін жүргізіледі. Бірақ Қызылорда қаласындағы 6 учаскеде заңнамада көзделген тәртіппен дауыс берудің басталу уақыты таңғы 6-дан бастап белгіленді. Бұл учаскелер әскери бөлім мен 5 кен орындары. Тиісті қаулы қабылданды.
Барлық сайлаушыға шақыру қағаздары таратылып, смс хабарламалар жөнелтілді. Қазіргі таңда науқанға әзірліктің соңғы сәттеріне келдік. ҚР Орталық сайлау комиссиясынан бюллетеньдер келді. Енді оны аумақтық сайлау комиссиялары күзет қызметімен бірге учаскелерге табыстайтын болады.
Жалпы сайлау комиссиясы мүшелері сайлаушылардың дауыс беруін ұйымдастыруға дайын.
Сұхбаттасқан
Е.ДӘУІР
