18 тамыз – Отан шебін күзетіп, ел қауіпсіздігін қамтамасыз етіп жүрген шекарашылардың кәсіби мерекесі. Бұл бағытта қызмет етіп жүрген шекарашылар ел тыныштығы мен тұрақтылығын сақтауға өз үлестерін қосып келеді. Айтулы мереке қарсаңында Өңірлік коммуникациялар қызметінің ақпарат алаңында «Застава тарландары» РҚБ Қызылорда облыстық филиалының төрағасы Асан Худояров шекара қызметінің маңызы мен сала ардагерлерінің еңбегіне тоқталды.
Оның айтуынша, шекара қызметі – жоғары жауапкершілікті, қырағылықты және Отан алдындағы шынайы адалдықты талап ететін абыройлы міндет. Ел шебін қорғаған азаматтардың ерлігі мен табандылығы кейінгі ұрпаққа үлгі.
– Қазіргі таңда шекара қызметінің жұмысына қызығушылық танытатын оқушыларға арналған 10 үйірме тұрақты түрде жұмыс атқаруда. Аталған үйірмелерді Шиелі, Қуаңдария және Байқоңыр шекара бөлімдерінің офицерлері бірге ұйымдастырады. Онда оқушылар шекара қызметінің ерекшеліктері мен негізгі бағыттары туралы жан-жақты біле алады. Сонымен қатар қала аумағындағы мектептерде департамент офицерлері арнайы сабақтар мен практикалық кездесулер өткізіп тұрады. Сабақ барысында оқушыларға шекараны қорғау, із кесу және ізді анықтау, кинология, қызметтік иттерді пайдалану, шекара қызметінің тактикасы және басқа да арнайы бағыттар бойынша теориялық және практикалық ақпарат беріледі, – деді Асан Беркімбекұлы.
Үйірмелердің негізгі мақсаты – жасөспірімдердің бойында Отанға сүйіспеншілікті, патриоттық сезімді, тәртіптілік пен жауапкершілікті қалыптастыру, сондай-ақ оларды әскери қызметке және шекарашы мамандығына бағыттау. Оқушылар шекара қызметінің күнделікті жұмысымен танысып, офицерлерден тікелей тәжірибелік білім алады. Бүгінгі күні аталған үйірмелерге 200-ге жуық оқушы тіркеліп, тұрақты түрде қатысып келеді. Бұл жұмыс жастардың әскери-патриоттық бағытта тәрбиеленуіне және мамандықты дұрыс таңдауына оң ықпал етеді.
Спикердің айтуынша үйірмелерге белсенді қатысатын, оқу үлгерімі мен тәртібі жақсы, әскери қызметке қызығушылығы жоғары оқушылардың алдағы уақытта Қазақстан Республикасы Ұлттық қауіпсіздік академиясына оқуға түсу мүмкіндігі жоғары. Осы бағыттағы жүйелі жұмыс жас ұрпақтың бойында ел қауіпсіздігіне жауапкершілікті арттырып, болашақта білікті әрі кәсіби шекара қызметкерлерін даярлауға септігін тигізеді.
«СБ» ақпарат
