Кеше облыс әкімі Гүлшара Әбдіқалықова Қазақстан халқы Ассамблеясының құрылғанына 25 жыл толуына орай облыстық ҚХА құрылымдары және этномәдени бірлестіктің жетекшілерімен кездесті. Шара Қазақстан халқы Ассамблеясының тарихынан сыр шертетін «Жасампаз 25 жыл» фотогалереясымен танысудан бастау алды.
Мұнан соң аймақ басшысы ҚХА-ның этнос өкілдерін бір арнаға тоғыстырып, еліміздегі татулық пен ауызбірлікті арттыру мен тәуелсіздігіміздің нығаю тарихындағы рөлін айрықша атап өтті.
– Бүгінгі басқосуымыз Ата Заңымыз – Қазақстан Республикасы Конституциясының 25 жылдығы қарсаңында өтуде. Елбасы Нұрсұлтан Әбішұлы Назарбаевтың бастамасымен құрылған Қазақстан халқы Ассамблеясына биыл 25 жыл толып отыр. Қатар келген қос мереке құтты болсын!
Өздеріңізге мәлім, Қазақстан халқы Ассамблеясы қоғамдық келісім мен жалпыұлттық бірліктің өміршең құралына айналды.
Ұлтқа ұя, жығылғанға пана бола білген қасиетті Сыр өңірінде «бейбітшілік», «тыныштық», «тұрақтылық» деген маңызды ұғымдарды қалыптастыруда толымды істердің атқарылғанын айта аламыз. Бұл игі істерде сіздердің де өзіндік үлестеріңіз бар. Бүгінде баршамыздың басты мақсатымыз – елімізде қоғамдық келісім мен тұрақтылықты сақтап, этносаралық татулықты қамтамасыз ету, толымды жетістіктерімізді еселеп, әлеуметтің әлеуетін көтеру. Осы міндеттерді орындауда облыстық ҚХА қызметін жаңа деңгейге көтеріп, Қазақстан халқы Ассамблеясының рөлі мен мәртебесін арттыруда, өңірдегі достық пен бейбітшілікті нығайтуда бірлесіп жүйелі жұмыс атқаратын боламыз, – деді облыс әкімі Г.Әбдіқалықова.
Шара барысында бірлестік жетекшілері өңірдегі ҚХА-ның қызметін жандандыру және оның рөлі мен маңызын арттыру бағытындағы ұсыныстарын ортаға салды. Мәселен, «Славяне» қоғамдық-мәдени орталығы» облыстық қоғамдық бірлестігінің төрайымы Галина Щербакова бейбітшілік пен келісім мекеніне айналған Сыр өңірі жайлы айта келе, Белкөл кенті мен Рысқұлов көшесінде орналасқан бейіттердің айналасына жөндеу жұмыстарын жүргізу, жоғары және орта оқу орындарында орыс тілінен дәріс алатын топтар ашуға ұсыныс білдірді. «Қазақстан корейлер қауымдастығы» облыстық қоғамдық бірлестігінің төрайымы Елена Ким Корей этномәдени бірлестігінің 30 жылдығына байланысты әнші Виктор Цойға арнап ескерткіш орнатуды, сондай-ақ, Қызылорда политехникалық колледжінде ұзақ жыл қызмет атқарған Алексей Цойға арнап музей ашуға ұсыныс жасады. Ал, облыстық өзбек этномәдени бірлестігінің төрағасы Қахар Дадашев өңірдегі кәсіпкерлік саласы, қайырымдылық бағытындағы Ассамблеяның рөлі туралы ойларымен бөлісті. Сондай-ақ, облыстық татар этномәдени бірлестігінің төрайымы Галия Гизатуллина этномәдени бірлестіктердің ұлттық мерекелері туралы ойын ортаға салса, облыстық ҚХА жанындағы Аналар кеңесінің төрайымы Нұрсауле Мусаева отбасы және ұлттық тәрбие құндылықтарын насихаттаудағы Аналар кеңесінің рөлі туралы сөз етті.
Ұсыныс пікірлерді тыңдаған облыс әкімі көтерілген мәселелердің шешім табуына ықпал ететіндігін жеткізді. Сонымен бірге, жасампаздыққа, ізгілікке толы 25 жыл ішінде қоғамдық келісім мен тұрақтылықты сақтауға қосқан елеулі үлестері үшін облыстық этномәдени бірлестік пен құрылым жетекшілеріне «Қазақстан халқы Ассамблеясына – 25 жыл» мерекелік медалін табыстады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
