Қызылордалық «Қайсар» ел біріншілігінде сәттілік сериясын жалғастырып келеді. Жерлестеріміз соңғы алты турда үш мәрте жеңіске жетіп, турнир кестесіндегі жағдайын жақсарта түсті.
Өткен жексенбіде қызылордалық футболшылар Павлодарда жергілікті «Ертіспен» шеберлік байқасты. Алаң иелері осал қарсылас емес. Әзірге жоғары орындардан көріне алмай жүргенімен, кез-келген қарсыласына оңай ұпай бере салмайды. Сондықтан «Қайсар» үшін бұл кездесудің оңайға соқпайтыны анық еді.
Алғашқы минуттан қос қарсылас бір-бірінің қақпасы маңынан жиі бой көрсетті. Жылдам гол соғу мүмкіндігін көздеген олар діттеген мақсатына жете алмай жатты. Десе де ойынның 15-минутында «Ертіс» сапынан Жан Морел По Нұрымжан Салайдин қорғаған қақпадан саңылау тауып, өз командасын алға шығарды. Бұдан кейін қызылордалық футболшылар белсенділігін арттыра түсті. «Қайсардың» жартылай қорғаушысы Никола Цуцкич 44-минутта айып добын шебер орындап, қақпа торын бүлк еткізді.
Екінші кезеңде қос команданың есепті өзгертетін бірнеше мүмкіндігі болған еді. Нәтижесінде 65-минутта «Қайсар» қорғаушысы Стефан Букорац әуелете берілген допты баспен қақпаға енгізді. Осылайша жерлестеріміз сырт алаңда қарсыласынан 2:1 есебімен басым түсіп, маңызды үш ұпайға қол жеткізді.
Бірінші айналымнан кейін 17 ұпай жинаған қызылордалық клуб турнир кестесінде 11-орынға көтерілді. Енді олар екінші айналымның алғашқы ойынын 5 шілдеде өз алаңында «Ертіске» қарсы өткізеді.
Әділжан ҮМБЕТ,
«Сыр бойы»
